Ich Wilhalm der H/onhaymer, bruder in dem spital an dem fuzz der prukk ze Regenspurch, vergich offenbar mit disem brif, :I daz mein herren vom chor vnd von dem rat ze Regenspurch, die des spitals /vberh/orart sint von iren gnaden mich ledich habent lazzen meiner vanchn/uzze mit der beschaiden, daz ich einen gestalten ait han gesworen, daz ich desselben spitals noch des maisters noch der bruder noch der d/urfftigen schaden f/urbaz an dehainer stat werben noch handeln schol innerhalb noch auzzerhalb des landes an dehainer stat noch anders niemant von meinen wegen. Ich han auch gesworen, daz ich vnd alle mein frevnt aller l/aut frevnt schol sein die an meiner vanchn/uzz schuldich sint gewesen mit worten mit werchen vnd mit raten, si sein innerhalb oder auzzerhalb des spitals ganczleich an allez gevar vnd han auch in den ait genomen, daz ich den vorbenanten herren von dem chor vnd von dem rat ze Regenspurch vnd auch dem maister vnd den brudern des egenanten spitals in allen sachen gehorsam schol vnd wil sein mit meinem dienst nach der armen d/urftigen notdurft, swaz man mit mir schaffet vnd wie man mich leben haizzet vnd ze einer sicherhait aller vorgeschriben sache han ich meinen offtgenanten herren ze porgen geseczt hern Herman den St/oren pfleger zv Viehausen, hern Fridreich den Schnefpechen vnd hern Otten den Alenstorfer, die durch irer trewen willen zv mir gelobt habent ze volf/uren vnd st/at ze halden, daz vor stet geschriben. Vnd dar/vber ze vrch/vnd gib ich disen brif versigelt mit meiner egenanten p/urgen insigeln vnd verpint mich darvnder st/at ze halden daz vor stet geschriben. Daz ist geschehen nach Kristes geb/urt drevczehenhundert iar vnd in dem ne/vnvndvierczigisten iar an sand L/aurenczen tag.