Ich Vlreich der Retzprot, weilent dez spitals hofmaister ze dem Hohenperg, vnd ich Wernher sein pruder, vnser hausfrawn vnd all vnser erbn :I vnd nachkomen, veriehen vnd tun chunt allen den, di den brif ansehent oder hornt lesen, daz wir vns mit veraintem gutem willen vnbetwungenleich mit freyem m/ut, verricht vnd verteidingt haben mit vnserm genedigen herren, hern Gorgen dem Denkchlinger, chorherre ze alten chappell ze Regens(purch) vnd zu den zeiten maister dez spitals sand Katrein, an dem f/uzz der prukk ze Regens(purch), vnd gemainleich mit der sam/ung doselben vmb allew handlung irs vorgenanten hofs ze dem H/ohenperg, vmb einnemen vnd vmb auzgeben, daz wir darauff getan haben als verre vnd alz freuntleich, daz wir vmb all vergangen sach vntz auf den tag heut nichcz auzgenommen, f/urbaz hincz in noch hincz irem vorgenanten hof ze dem H/ohenperg vnd waz darzu geh/ort, besucht vnd vnbesucht, noch hincz allen iren guten dhain ansprach noch vodrung nicht mer haben noch gewynnen sullen noch enm/ugen, weder mit gaistleichem noch werltleichem rechten, noch on recht, chlain noch groz, furbaz nymmer mer noch anders yemant von vnsern wegen in dhainerlay weis. Darzu bechenn ich obgenanter Vlreich der Retzprot, waz ich noch geltz vnd schuld auf irem vorgenanten hof ze dem H/ohenperg hinder mir lazzen han von der zeit vnd ich ir hofmaister gewesen pin, daz sol ich allez selb auzrichten vnd vnchlaghaft machen, on allen iren schaden, daz man darvmb an si noch an iren hof nichtz ze uodern haben sol noch enmag; vnd /vber daz allez beleib ich in mit redleicher rechnung vnd mit meiner guten gewizzen schulldig, zwaintzikch pfunt Regens(purger) pfenning, daz ich vnbetwungenleich bechant han. Nu habent si mir di genad getan, daz ich in allew jar j/arleich ayn pfunt Regens(purger) pfenning daran geben sol, on allew verpot vnd f/urzokch, ye an sand Michels abent oder an seinem tag ze Regens(purch) in der stat, on allen iren schaden, Regens(purger) pfenning di dann gib vnd g/ab sind. W/ar aber, daz ich Vlreich der Retzprot in der zeit von todez wegen abging, waz ich in dannoch daran schulldig belib daz solt f/urbaz ab sein, vnd w/ar main hab darvmb ledig; w/ar aber daz ich in daz pfunt pfenning mein lebtag j/arleich daran nicht g/ab alz vor uerschriben ist, welhen schaden si dez nemment, dez s/ullen vnd m/ugen si j/arleich mit sambt dem pfunt pfenning von mir vnd von aller meiner hab bechommen, mit gaistleichem oder werltleichem rechten, wann vnd wie si wellent, on allen chrieg vnd widerred. Vnd dar/uber zu vrch/und geben wir in den brif versigelt mit hern Chunrat dez Pf/ollnchofer, zu den zeiten pfleger ze Chefring, insigel, daz er an den brif gelegt hat nach vnsrer vleizz(igen) pet der sach zu einer gezeukchn/uzz, im vnenkolten, darvnder wir vns verpinden mit vnsern trewn st/at ze halten waz an dem brif verschriben ist. Daz ist geschehen nach Cristi gepurtt dreuczehenhundert jar vnd in dem f/umfvndsibenczgisten jar dez nochsten eritagz vor sand Katreyn tag.