Ich Elspet dy Pr/obstinn, Dytrichs dez Probst s/aligen witib von Illpach, ich Charl, ich Ch/unrad ir s/un, wechennen offenlich mit dem brief allen den, dy in sehent oder ho:Irent lesen, daz vns der ersam weschaiden her, Vlrich der Kuttnawer, dy zeit maister dez spitals sand Kathrein, an dem fuzz der pruk z/u Regens(purch), vnd gemainlich der conuent doselben lassen habent dez spitals aygen hof z/u Illpach mit allen den eren, rechten vnd n/uczen dy darz/u geh/orent, z/u veld vnd zu dorff f/ur ein freis ledigs g/ut von vnser fra/wntag z/u liechtmess der n/u vergangen ist, darnach /vber dre/w gancze/w jar dy schirst nacheinander ch/oment, daz wir den inne haben pa/wlichen pa/wn vnd wesenlichen stellen sch/ullen vnd wellen, zu veld vnd z/u dorff, wo im dez not ist, an allen iren schaden. Wir s/ullen in auch i/arlichen davon dynen vnd geben ir traidg/ult nach wescha/wung, nach irs salpuchs sag mit sampt dem wisgelt vnd chlainem dinst der davon geh/ort z/u rechter zeit vnd weil als andrer herren dinst vnd g/ult recht ist, an allen abgankch, vnd s/ullen in dy i/arlich antwurten gein Regens(purch) in daz spital auf iren chasten, wo sy hin wellent an all widerred. Wir s/ullen auch i/arlich in ir stift ch/omen, mit in stiften vnd irer stift recht t/un als ander ir mair an widerred, vnd swelhes jars wir dem obgenanten spital sein g/ult nicht g/anczlich richten vnd werten mit sampt dem wisgelt vnd den chlainen dinst oder daz wir den egenanten hof nicht pa/wlichen pawten vnd wesenlichen stelten, z/u veld vnd zu dorff, so mag daz obgenant spital oder wer dann spitalmaister ist, den oftgenanten hof z/u Illpach mit aller zugeh/orung lassen, wem si wellent; daz wir si noch anders niempt von vnsern wegen daran nicht engen noch irren s/ullen, noch m/ugen, weder mit recht noch an recht, in dheiner weis. Wir s/ullen vnd wellen auch dy czimer auf dem vorgenanten hof pessern an aller stat, wo in dez not ist in jarsfrist, vnd wann daz geschiecht, so s/ullen vnser obgenant herschaft ainen erbern man nemen vnd wir auch ainen, vnd was dy zwen sprechent nach iren tre/wn, das vns pilleich daf/ur s/ull abgen, daz s/ullen sy vns von iar z/u jar abslahen vnd ablassen gen an der g/ult dy wir in schuldig sein; vnd swann auch dy vorgenanten dre/w jar hin vnd vergangen sind, wellent si vnser dann auf irem vorgenanten hof nicht mer haben noch wissen z/u pa/wla/wten, so ist dem spital der oftgenant hof z/u Illpach mit sampt den zimern darauff vnd was darz/u geh/ort, zu veld vnd zu dorff, g/anczlich vnd gar ledig worden, vnd s/ullen vnd wellen auch den hinder vns pa/wlich vnd wesenlich ligen lassen, z/u veld vnd zu dorff, vnd ledichleich davonvaren an alle/w widerred, daz wir noch all vnser nachkomen hincz dem obgenanten spital noch irem aigem hof z/u Illpach vmb pa/wrecht noch vmb zimer, noch vmb chain ander sach f/urbas chain ansprach, zuspr/uch noch vodrung nymer haben noch gewinnen sullen, noch m/ugen, weder mit gaistlichen noch wertlichen rechten, noch an recht noch anders niempt von vnsern wegen in dheiner weis, vnd was wir oder iemant anders von vnsern wegen dar/vber mit in chriegten oder rechten, daz geben wir in alles gewunnen vnd wehabt vnd vns verloren an aller stat. Des z/u vrch/und vnd west/atichait geben wir in den brief versigelten mit herren Albrecht dez P/urchtal/ar, zu den zeiten richter z/u S/unching, insigel daz (er) an den brief gelegt hat nach vnsrer fleizzigen pet, im vnd seinen erben vnenkolten vnd an schaden, darvnder wir vns verpinden, ich obgenantew Elspet dy Pr/obstinn, ich Charl vnd ich Chunrad ir s/un vnd vnser nachkomen mit vnsern tre/wen st/at ze haben vnd zu volf/uren daz an dem brief verschriben ist. Dez sind zewgen vnd t/adinger gewesen: Vlrich, veter z/u Malgossing, Dytrich Hirsfelder, Haimran H/auperger, Vlr(ich), pr/obst vnd Hanns, schreiber in dem spital. Daz ist geschehen nach Christi gep/urtt dre/wczehenh/undert jar vnd darnach in dem dre/wvndne/wnczigisten jar dez montags nach oculy in der vasten.