Ich Liebhartt der Prettpekch, an der zeit maister dez spitals sand Kathrein an dem fuezz der pr/ukchen zu :I Regenspurkch, vnd gemainchleich die samung doselben, bechennen vnd t/un ch/unt offenleich mit dem brief allen den, die in sehent, h/orent oder lesent, daz wir mit rat, gunst vnd gutem willen vnserr genadigen herren von dem kor vnd von den rat der stat zu Regenspurkch, recht vnd redleich verlihen vnd lazzen haben vnser vnd dez spitals aigen weingartten, genant der Pl/vm, gelegen oberthalb dem weyar vnd st/ozzt an dew paureben Perchdoldem dem Mvchenstainer vnd Rugern dem Muchenstainer seinem svn, ped gesessen vor dem wey/ar auf ir paider leib fridleich vnd freileich ynn zu haben, zu wesitzen, zu niessen vnd zu n/utzen alz leibtings recht ist, all die weil vnd die vorgenanten zwen leib dann paid lebent oder ir ainer, mit der weschaiden, daz si den obgenanten weingartten pewleich vnd wesenleich halten, stellen vnd verwesen s/ullen mit mist, mit stechken, mit erd tragen, mit lesen, mit pietlon vnd mit aller arbaitt, s/vmer vnd winter, nichtz auzgenomen, alz dez paws vnd ander guter pawle/wt recht ist, an alles gev/ar vnd an all vnser m/ue vnd schaden. Si sullen auch vnserm vorgenanten spital aller iar iarleichen davon dienen, geben vnd mittailen vor dem piet ye den dritten emer weins, alz vil dann weins an vnserm vorgenanten weingartten wirt vnd iarleich einen emer weins vorauz von vngetailtem wein an all vnser m/ue vnd sch/aden. Wir sullen vnd m/ugen a/uch iarleich in vnsern vorgenanten weingartten senden vir erberg man, die dy arbait erchennen chvnnen, daz si die schawn vnd schatzen ob si dem spital hilfleich vnd nutzleich sein, vnd welchs iars sich daz erf/und daz si den vorgenanten weingartten nicht pawleich vnd wesenleich stelten, hielten vnd volfurten alz vorher verschriben ist, so sind si zu hant darnach abgeschaiden von irem leibting vnd von allem irem rechten, alz verr daz si noch all ir erben vnd nachkvmen noch yemant anders von iren wegen auf den vorgenanten weingartten vnd waz darzu geh/ortt, vnd wem wir in dann furbaz lassen, dhain ansprach noch vodrung nicht mer haben noch gewinnen sullen noch enm/ugen in dhainer weis. Ez schullen noch enm/ugen auch die vorgenanten zwen leib noch ir ainer der dann lebt ire/w recht noch leibting auf vnserm vorgenanten weingartten weder verchvmern, verchawffen noch versetzen an vnserr vorgenanten pfleger vnd auch an eins maisters willen, wissen vnd gunst, der dann ie zu derselben zeit maister ist; vnd ob si darvber anders icht handelten oder t/aten, haimleich oder offenleich, daz sol chain kraft noch furganchk haben an dhainer stat wider den gagenburtigen brief. Vnd wann nu die obgenanten zwen leib von todes wegen abgegangen vnd nicht mer sein, so ist vns vnd vnserm vorgenanten spital der oftgenant weingartt mit allem paw vnd mit allen eren, rechten vnd n/utzen zu durchslathtz ledig vnd los worden, daz weder ir hawsfrawn noch all ir erben vnd nachkvmen furbaz darauf noch darnach dhain gewer, ansprach noch vodrung nicht haben noch gewinnen sullen noch mugen, weder mit recht noch an recht, noch anders yemant von iren wegen in dhainer weis. Vnd ob si darvber mit vns kriegten oder rechtent, ez war mit recht oder an recht, geistleichem oder wertleichem, daz haben wir an aller stat vnd zu aller stund gew/unnen vnd wehabt vnd si verlorn. Der sach sind teiding/ar gewesen: Karl der Sn/apel, burger in der vorstat zu Regenspurkch vnd Hainreich der Snoper, burger zu Regenspurk, vnd Chunrad der Rawsch/ar, schreiber dez egenanten spitals vnd ander erberger lewt gen/uchk. Dez zu vrch/und, so geben wir in den brief mit vnser maisters vnd mit dez conventz anhangenten insigeln. Daz ist geschehen, do man zalt nach Cristi gep/urtt drewtzehenhundert jar vnd darnach in dem achtvndnewntzigistem jar an sand Peterstag zu der kettenveir in der vasten.