Ich Liebhart der Pretpekch, an der zeit maister dez spitals sand Katreyn an dem fuez der brukk tzu Regens(purch) :I vnd gemainleich die samenung doselb veriehen offenleich mit dem brief, daz wir mit veraintem gutem willen vnd mit rat vnd wizzen vnserer genadigen herren vom cappitel vnd vom rat, die dez spitals pfleger sind, ain haws vnd hofstat, gelegen zu Regenspurg ze nachst bey sand Lienhart, vnd ist ain chlains ekkhaws an dem Chirchweg, recht vnd redlichen lazzen haben zu ainem ewigen zinslehen Otten dem Vnt/al, purger zu Regens(purg), seiner hawsfrawn vnd allen iren erben vnd nachkomen mit der beschaiden, daz si dy ersten zway jar nichtez douon geben sullen; vnd sullen daz haws in denselben zwayn jarn wider pawleich vnd wesenleich stellen nach irer notd/urft, wan ez zumal pawvellig vnd /od waz worden; vnd f/urbaz nach denselben zwayn jarn sullen si vns vnd dem spital alle jar j/arlichen douon zu zins geben f/umftzikch Regenspurger pfenning, die ye dann gib vnd g/ab sind zu Regenspurg in der stat ye an sand G/orgen abent oder an seinem tag an allen abgankch nach der stat purkchrecht; vnd si vnd all ir nachkomen, wer ye dann ir groz haws ynn hat, daz zu nachst daran ligt, sullen auch daz vorgenant chlain ekkhaws allczeit pawleich vnd wesenlichen halten vnd mit schaczstewr vnd mit allen sachen awfrichten vnd allen iren frummen vnd willen domit tun, allez vns vnd dem spital an schaden vnd vnenkolten an dem vorgenanten zins, den wir allczeit douon haben sullen an allen abgankch, es ste daz vorgenant haws /od oder nicht, douon daz si ez zu irem grozzem haws wol prechen vnd n/uczzen sullen vnd m/ugen. Daz in vnd allen iren nachkomen oder wer den brief von iren wegen ynn hat vnd furbringt daz allez also st/at vnd vnczebrochen beleib, dar/uber zu vrch/und geben wir in den brief besigelten mit dez maisters vnd dez spitals insigeln. Dez sind taidinger gewesen her Vlreich der probst, an der zeit der stat kamerer, vnd her Conrat der Enikchel vnd Lienhart der statschreiber. Daz ist geschehen nach Christi gebwrt drewczehenhundert jar vnd in dem achtvndnewnczigistem jar an sand Gorgen abent.