Ich Stephan vnd ich Lienhart di Schonnstainer, zu den zeiten pfleger des hoffs der vorstat zu :I Regenspurg, veriehen offenlich mit dem brief, vmb all di chrieg vnd zwiburff, di sich verloffen habent zwischen vns vnd Martein dez Gebenpekchen, an der zeit spitalmeister dez spitals sand Kathrein an dem fuezz der prukk zu Regens(purg) vmb all di zuspr/uch, di wir vns hincz im vnd hintz dem spiztal f/urgenomen heten von dez gerichtz in der vorstat wegen vnd von aller sach vnd handlung wegen, nichtz ausgenomen, vncz auf den tag hewt alz der brief gegeben ist, vnd da sey wir frewntleich von geweist worden vnd haben angesehen di gepet dez hochwirdigen f/ursten, vnsers genadigen herren, hern Johannsen, bischof zu Regens(purg), vnd auch der burger dez ratz der stat zu Regens(purg), vnd haben daz spital vnd den spitalmeister vmb all zuspruch vnd vnwillen ze durchslecht ledig vnd loz gesagt mit dem brief, den wir in zu vrchund geben, besigelten mit vnser paider anhangenden innsigeln. Daz ist geschehen nach Christi gep/urtt drewzehenhvndert jar vnd in dem sechsvndnewnczigistem iar an dem weissen sonntag in der vasten.