Ich Johan, Leuman, Elspet vnd Ann, Chungund vnd Præid, Chlar vnd Alhait, :I Ortliubs chint von Phæter t/un chunt allen den, die disen brief ansehent /oder h/orent lesen, daz wir vns verriht haben mit dem maister von dem spital ze Regenspurch vnd auch mit der samnung dezselbez conventes vmb den hof ze Waltchouen, den der Gezzel het gechauft von vnserm vater Ortlieben von Phaeter dem got genad, daz wir auf dazselben g/ut chain ansprach sch/ulen haben, wir noch chain vnser afterch*und ewichleichen, vnd dezselben sint gezeug: her Ludweich der Pærwinger, Wernher der probst, Hainreich der amman von Phæter, Seibolt der Furel von Wierd, Chunrat der Glouacz, Liubhart der Volay vnd ander biderlæut, di dapei waren. Vnd daz in daz also stæt vnd vnzerbrochen beleib, verbint wir vnz vnder vnserz genædigen herren hern Ekprehtz von Haydauue insigel, wan wir chain insigel haben. Daz ist geschehen, da man von Christus gep/urt zalt dreuzehenthundert jar darnach in dem zwainczkistem jar dez suntagez vor sant Marteyns tag.