Ich Eberhart von Laychlingen vergih vnd t/un chunt allen den, die disen brief ansehent oder :I h/orent lesen, daz ich den hof ze Laychlingen von dem maister dez spitals ze Regens(purch) vnd von den br*udern dezselben conuentes ze paureht het, han ich mich mit in verriht, also daz ich furbaz auf denselben hof noch auf dehain ir g/ut niht mer ze sprechen han, weder ich noch dehain mein erbe noch mein friunt. Si s/ullen auch den vorgenanten hof ze Laychlingen nu furbaz besetzen mit swem si wellen, vnd dez sol ich in geholfen sein mit allen treuwen, als fur ich chem vnd mack. Daz in daz also sta't vnd vnzebrochen beleib, gib ich in disen brief versigelt mit meinem insigel. Dez sint geziuge: der pfarrer von Laychlingen; her Seyfrid der schreiber in der vorstat ze Regens(purch); Eberhart der Schefel; V*lr(eich) der Peuwirt; Heinr(eich) der M/ullener; hern Vlr(eich), pr*uder dez caplans von dem spital vnd anderr frumer leut gen/uch. Daz ist geschehen, do man zalt von christes gepurt tausent iar vnd dreuhundert iar darnach in dem zwaintzigisten iar an sant Matheiz tag dez heiligen zwelfpoten.