Ich Fridreich der T/untzling/ar, burg/ar z/u Tvmstauff, ich Otilg sein hausfra/w vnd alle vnser erben, veriehen vnd t/un ch/unt :I allen den, die den brief ansehent oder h/ornt lesen, das wir vnser Setzz dy gelegen ist z/u T/vmstauff an der Grewzz z/u nochst an Otten dez Griespekchen weingartt da man aus derselben Setzz j/arleich z/u zins gibtt zwaintzikch Regenspurger pfenning an sand Martteins abent oder an seinem, tag in den weingartten der genant ist do Snarren, den yez/u pawt Hainreich der Grub/ar, vnd vnser aubel gelegen oben an der egenanren Setzz, da man aus demselben anbel j/arleich z/u zins gibtt sechs Regenspurg/ar pfenning vnd zway h/uner an sand Michels abent oder an seinem tag hern Hainreich dem Stauff/ar vnd seinen erben mit sambt dem Pawmgartten nyden vor der vorgenanten Setzz gelegen, das alles lehen ist von dem hochwirdigen heren, dem bischof z/u Regens(purch) mit sambt den brief vnd vrch/unden di dar/vber geh/ornt vnd mit allen den rehten, ern vnd n/utzzen, dy darz/u geh/ornt, bes/uchtt vnd vnbes/ucht, nichtz ausgenommen, recht vnd redlich z/u durchsl/acht verchaufft vnd geben haben als chauffes reht ist, hern Albreht dem Holnstain/ar, seiner hausfrawn vnd allen irn erben, burg/arn z/u Regens(purch), vmb ein sogetan gelt des sy vns gantz vnd gar verrichtt vnd gewert habent mit beraiten pfenning. Wir haben auch in dy vorgeschriben g/ut alles aufgeben, best/att vnd in ir hant praht mit des vorgenanten vnsers gen/adigen lehenherren hant, hern Johanns, bischof z/u Regens(purch), der in dyselben g/ut mit aller z/ugeh/orung rechtt vnd redlich verlihen hat nach vnserer fleissigen pet, alz er z/u reht schol, vnd wir verzeihen auch vns derselben g/ut aller, mit aller z/ugeh/or/ung, zu durchsl/achtt alz verre daz wir noch alle vnser eriben vnd nachkommen darauf noch darnach in dhainer weis dehain ansprach noch dehain voderung nicht mer haben noch gewinnen sch/ullen noch enm/ugen, weder mit reht noch an reht, chlain noch gros, f/urba nymer mer noch anders nyemant von vnsern [wegen], darzu versprechen wir in mit vnsern trewn, daz wir in dy vorgeschriben g/ut mit aller zugeh/orung, bes/ucht vnd vnbes/ucht, f/ur allen irresal vnd ansprach, versten vnd versprechen sch/ullen vnd wellen mit dem rehten alz des lehens, des zinses, der hofmarch vnd der herschaft reht ist, da dyseleben g/ut ynn gelegen sind an allnen irn schaden, t/aten wir des nicht, welhen schaden sy des genommen habent oder nemment, des sch/ullen vnd m/ugen sy von vns vnd von aller vnserer hab bechommen vor allen la/uten mit den rehten wy sy wellen, an alle irreung vnd widerred, vnd ob f/urbas icht mer brief vnd vrch/unde f/ur ch/ommen, di /vber dy vorgeschriben g/ut sagten, es w/ar /vber ain stkch /oder mer, wo vnd von wem dy f/urchomment, di sch/ullen an aller stat alle tod vnd ab sein vnd nicht chraft haben noch gewinnen, chlain noch gros in dhainer weis. Vnd ob wir oder yemant anders dar/vber vnd wider das was an dem brief geschriben stet mit yn chriegten odr rehten, mit reht oder an reht, das bechennen vnd geben wir in an aller stat allez gew/unnen vnd behabtt vnd vns verlorn, an alle widerred. Das in vnd allen irn erben vnd nachkommen oder wer den brief von irn wegen ynn hat vnd f/urpringt, das alles also st/at vnd vntzerbrochen beleib, dar/vber z/u einem vrch/unde geben wir in den brief besigelten mit dez erbergen vnsers richtter insigel, hern Ch/unrat des Rornsteter, an der zeit pfleg/ar vnd richtter z/u T/vmstauff, der das an den brief gelegt hat nach vnserer fleissigen pet der sach z/u einer gezeukchn/usse, im vnd seinen erben vnenkolten vnd an schaden vnd auch vnenkolten der herschaft an dem vorgeschriben zins vnd an irn rehten dy sy auf den vorgenanten g/uten habent, vnd darvnder verpinden wir vns vnd alle vnser erben vnd nachkommen vnuerscheidenlich mit vnsern trewen st/at z/u haben was an dem brif geschriben stet. Vnd dez chauffs vnd gewerstz sin ze/wgen, dy dabey gewesen sind: Perchtolt der Pl/odel vnd Ott der Grozz, payd burger z/u T/vmstauff, vnd Vlreich der P/okelman, burger z/u Regens(purch), vnd ander erberg l/aut. Das ist geschehen nach Chrissty gep/urtt drewtzehen h/vndert jar vnd in dem dre/wvndnewntzigistem jar an sand Grei/orgen tag in der vasten.