Ich Liebhart der chaufmann zu Walchofen, mein hausfraw vnd all vnser erben wechennen offenlich :I mit dem brief allen den, dy in ansehent oder h/orent lesen, das vns der ersam, weschaiden her Vlrich der Kuttnawer, dy zeit maister dez spitals sand Kathrein an dem fuzz der pruke zu Regens(purch) vnd der conuent doselben lassen habent dez spitals aygen hof zu Walchofen, darauf vor zeiten der Essenpekh gesessen ist, vnd was darzu geh/ort zu veld vnd zu dorf f/ur ein freysezz ledigs gut, daz wir den im hin fur inne haben vnd pawn sullen vnd wellen, wo im dez not ist, an allen iren schaden vnd gepresten. Wir sullen in auch j/arlich davon dinen vnd geben ir g/ult nach ires salpuchs sag nach weschawung mit sampt dem wisgelt vnd chlainem dinst, der davon geh/ort zu rechter weil vnd zeit als anderr herren dinst vnd g/ult recht ist, vnd sullen in dy j/arlich antwurtten gein Regens(purch) in dy stat oder in daz spital auf iren chasten, wo sy hin wellent an allen abgankch. Wir sullen auch i/arlich in ir stift chommen, irer stift recht tun vnd mit in stiften, alz ander ir mair an allew widerred, vnd swelhes iars wir dem egenanten spital sein g/ult nicht gancz richten vnd werten mit sampt dem wisgelt vnd chlainen dinst oder daz wir den hof nicht pa/ulich pauten vnd wesenlich stellten zu veld vnd ze dorffe oder mit in nicht stiften, alz vor verschriben stet, so hat der spitalmeister, wer der ist, vnd der conuent vollen gewalt, vns zu vercheren vnd iren egenanten hof zu Walchouen vnd was darzu geh/ort zu lassen, wem si wellent, daz wir sy noch anders niempt von vnsern wegen daran nicht engen noch irren sullen noch mugen vnd auch f/urbas chain ansprach noch vodrung darauf noch darnach nicht mer haben noch gewinnen s/ullen noch mugen, weder mit gaistlichem noch wertlichen rechten noch an recht in dheiner weis. Vnd ob wir oder anders yemant von vnsern wegen dar/vber mit in chriegten oder rechten, daz geben wir in allez, gewunnen vnd vns verloren an aller stat. Daz in daz allez also st/at vnd vnzebrochen weleib, dez zu vrchund geben wir in den brief versigelten mit hern Hillprant dez Wertinger, dy zeit lantrichter zu Geiselhering, vnd her Chunrad Pr/uschinkch, probstrichter doselben, insigeln, dy sy an den brief gelegt habent nach vnsrer fleizz(igen) pet, der sach zu einer gezewgnusse in vnd iren erben an schaden, darvnder wir vns verpinden mit vnsern trewen st/at zu haben, was an dem brief verschriben ist, trewlich an geu/ar. Dez sind zewgen vnd t/adinger gewesen: her Tomas Sitawer, Hainrich chelln/ar zu Obermunster, purger zu Regens(purch), vnd der egenant Chunrad der Pr/uschinkch. Daz ist geschehen nach Christi gep/urtt drewczehenhundert jar vnd darnach in dem drewvndnewnczigistem jar dez mikchen nach vnser frawn tag zu lychtmesse.