Ich Hainreich vnd ich Hartlieb, dez alten Hainreichs s/un von H/urelbach, vnser hawsfr/awn vnd all vnser erben wechennen offenlich mit dem brief allen den, dy in ansehent oder :I h/orent lesen vmb dy ansprach, zuspr/uch vnd vodrung dy wir gehabt haben hincz dem spital sand Kathrein an dem f/uzz der prukk ze Regens(purch) vnd hincz irem aygenn hof z/u H/urelbach vnd daz spital, der spitalmaister vnd sein pfleger, herwider hincz vns wie sich daz allez verl/auffen vnd engangen hat, nichcz ausgenomen vncz auf disen he/wtigen tag, darvmb sey wir nach vnsrer frewnt vnd andrer erberiger l/awt rat, mit her Vlrich dem Chuttnawer, spitalmeister, mit dem spital vnd seinen pflegern z/u Regens(purch) lyplich vnd fre/wntlich wericht, vertaydingt vnd verschaiden worden auf ein gancz ende, daran vns wen/ugt vnd sol auch all vnser ansprach auf pa/yderseitt ab vnd hin sein vnd f/urbaz nymer gemeldet noch gevordert werden in dheiner weis. Darnach hat der obgenant spitalmeister vnd sein pfleger, mir egenanten Hartlieben, meiner hawsfrawn vnd vnsern erben dy fre/wntschaft vnd genad getan vnd habent vns den obgenanten hof z/u H/urelbach vnd was darzu geh/ort, z/u veld vnd ze dorff, lassen f/ur ein freis, ledigs g/ut von vnser fra/wntag z/u lichtmess der nu vergangen ist, darnach /vber zehen gancze/w jar dy schirft nacheinander ch/oment, daz wir den ynne haben p/aulichen pawn vnd wesenlichen stellen, s/ullen vnd wellen, ze veld vnd ze dorff, wo im dez not ist an allen iren schaden vnd gepresten. Wir s/ullen in auch i/arlich davon d/ynen vnd geben ir traidg/ult nach wescha/wng, nach irs salpuchs sag mitsampt dem wisgelt vnd chlainem dinst, der davon geh/ort z/u rechter zeit vnd weil als andrer herren dinst vnd g/ult recht ist an allen abgankch; vnd s/ullen in dy i/arlich antwurten gein Regens(purch) auf iren chasten in daz spital, wo sy hin wellent an all widerred. Wir s/ullen auch i/arlich in ir stift ch/omen, mit in stiften vnd irer stift recht t/un, als ander ir mair an widerred vnd swelhes iars wir dem obgenanten spital sein g/ult nicht g/anczlich richtn vnd werten, mitsampt dem wisgelt vnd den chaine dinst, oder daz wir den egenanten hof nicht p/awlichen p/awten vnd wesenlichen stelten z/u veld vnd ze dorff, so mag daz obgenant spital oder wer dann spitalmeister ist, den oftgenanten hof z/u H/urlbach vnd was darz/ugeh/ort, wesucht vnd vnbes/ucht lassen wem sy wellent; daz wir sy noch anders niempt von vnsern wegen daran nicht engen noch irren sullen noch enm/ugen, weder mit recht noch an recht in dheiner weis, ez w/ar dann, als vil dez got nicht engeb, ob dy zimmer auf dem vorgenanten hof verpr/unnen, von dez spitals oder von rechten landes gepresten wegen m/ochten wir daz redlich webeisen, so sol daz obgenant spital ein mitleyden darum haben, daz der egenant hof hinwider geczimmert werd vnd swann auch dy vorgenant zehen jar hin vnd vergangen sind, wellent sy vnser dann auf irem vorgenanten hof z/u pawl/awten nicht mer wizzen noch haben, so ist dem obgenanten spital der oftgenant hof z/u H/urelbach mitsampt den zimmern darauf vnd was darzu geh/ort, z/u veld vnd z/u dorff, g/anczlich vnd gar ledig worden; vnd s/ullen vnd wellen auch den hinder vns p/awlichen vnd wesenlichen ligen lassen, zu veld vnd ze dorff, vnd ledichlich davon varen an all widerred. Daz ich obgenanter Hartlieb, mein h/awsfr/aw vnd all vnser erben vnd nachkomen, hincz dem obgenanten spital noch irem aygem hof z/u H/urelbach vmb p/awrecht, noch vmb zimmer, noch vmb chain ander sach wie dy genant ist, noch hincz aller dez spitals hab, l/awten vnd g/uten wo dy gelegen sind, f/urbas chain ansprach, zuspr/uch noch vodrung nymer haben noch gew/ynnen s/ullen noch m/ugen, weder mit gaistlichen noch wertlichen rechten, noch an recht, noch anders n/ympt von vnsern wegen in dheiner weis; vnd was wir oder anders /yemppt von vnsern wegen dar/vber mit in chriegten oder rechten, daz geben wir in alles gewunnen vnd wehabt, vnd vns verloren an aller stat. Dez z/u vrchund vnd west/atichait geben wir in den brief versigelten mit dez weysen, vesten ritter herren Hannsen dez Satelpoger z/u L/yechtenekk, vicztum in N/yderpa/yrn insigel, daz er an den brief gelegt hat durch vnsrer fleizzigen pet willen, im vnd seinen erben an schaden, darvnder ich mich obgenanter Hartlieb mein hausfra/w vnd vnser erben verpinden mit vnsern tre/wen st/at ze haben waz an dem brief verschriben ist. Dez sind zewgen vnd t/adinger gewesen dy erberigen herren: her Arnold von We/ydenberch, techant, her Ch/unrad der H/akchel, chorherren auf dem t/um, her Thomas Sytawer, her Arnold Spiczer, her Matheus Rantinger, purger vnd dez spitals pfleger z/u Regensp/urch vnd ander erber l/awt ein michl ta/yl. Daz ist geschehen nach Christi gep/urtt dre/wczehenhundert jar vnd darnach in dem dre/wvndne/wnczigistem jar dez s/untags als man singt rem/ynistere in der vasten.