Ich Vlreich der Haym, der visch/ar, p/urger ze Tvmstavff, mein havsfra/w vnd alle mein eriben veriehen vnd tvn chvnt allen :I den, di disen brief ansehent oder h/orent lesen, daz wir mit verayntem rat vnd mit g/utem willen recht vnd redleichen ze d/urchsl/acht verchavffet vnd geben haben als chavffes recht ist, vnsern wirde der gelegen ist ze Tvmstavff in der Tvna/w, genant daz Nevgera/vt, dez her Vlreich der Lyechtenberger von Altentanne rechter lehenherre ist, vnd da man im ye an dem weizzen svnntag alle jar a/uzgibt sechtzehen Regensp/urger pfening. Vnd den egenanten wierd haben wir ze d/urchsl/acht verchavffet mit allen den rechten, eren vnd n/vtzzen, di darz/u geh/orent als wir in selber inne gehabt haben, besvcht vnd vnbesvcht, dem ersamen m/ann Perchtolt dem Pl/odlein, dem vysch/ar, p/urger ze Tvmstavffe, seiner ha/usfraun vnd allen seinen eriben vnd nachkomen vmb sogetan gelt, dez si vns gar vnd g/antzleich verricht vnd gewert habent mit beraiten pfening, an allen vnsern schaden vnd gepresten, als verre, daz wir noch vnser nachkomen dehain ansprach noch dehain vodervnd daravf noch darnach niht mer haben noch gewinnen sch/ullen, noch enm/vgen, weder mit recht noch an recht, chlain noch groz, f/urbaz nimmer mer noch anders niemant von vnsern wegen. Wir haben avch in die lehenschaft /vber den vorgenanten wierde vnd swaz darz/u geh/ort ledichleichen aufgeben, best/at vnd in ir hant pracht mit vnsers vorgenanten lehenherren hant, hern Vlreich dez Lyechtenberger von Altentanne, der a/uch in den z/u rechtem lehen verlihen hat nach vnserer vleizzigen pet; darz/u haben wir in gelobt mit g/uten trewen, daz wir in den voruerschriben wierd vnd swaz darz/u geh/ort, besvcht vnd vnbesvcht, versten vnd versprechen sch/ullen mit dem rechten als rechtes lehens vnd der hofmarch, vnd auch dez landes recht ist, da der egenant wirde inne gelegen ist, swo vnd swie oft in dez not geschiecht, an allen iren schaden. T/at wir dez niht, swelhen schaden si sein d/ann nement mit dem rechten, den sch/ullen wir in abtvn vnd a/uzrichten mit sampt dem havptg/ut gar vnd g/anczleichen, an allen iren schaden vnd gepresten, vnd si sch/ullen auch denselben schaden mit sampt dem havptg/ut haben auf vns vnd avf aller vnserer hab, di wir haben, besvcht vnd vnbesvcht, als wir in daz vnuerschaidenleichen z/ueinander gelobt haben bey vnsern trewen an geu/ar. Daz in daz also st/at vnd vnzerbrochen beleib, dar/vber z/u einem vrchvnde vnd z/u einer best/atichait, geben wir in disen brief versigelten mit vnsers vorgenanten lehenherren insigel, hern Vlreich dez Lyechtenberger von Altentanne, der daz an den brief gelegt hat nach vnserr vleizzigen pet, der sach z/u einer geze/uchn/vzz, vnd wir verpinden vns dar/vber mit vnsern trewen, allez daz ze laisten vnd st/at ze behalten daz an dem brief verschriben ist, g/antzleich an allez gev/ar. Dez sint gezevg: Albr(echt) der H/onnhaymer, p/urger ze Regens(purch), H/artweig der La/vbl/ar von Tvmstavff, Hainr(eich) der vysch/ar von S/arching vnd Paldwein von Oberp/arbing, vnd ander erberiger la/ut ein michel tail. Daz ist geschehen nach Kristes gep/urtt drevtzehenh/vndert jar vnd in dem sybenvndf/vmftzigistem jar dez nochsten mitichens vor sand Johannes tag ze s/vnnbenden.