Ich Chvnrat der Nothaft von Haylsperch vnd pfleger ze Regenstavffe, vergich vnd tvn chvnt allen den, die disen :I brief ansehent oder h/orent lesen, daz sich Chvnrat der Rossezagel, der charrenman, purger ze Regenspvrch, liepleichen vnd fre/wntleichen mit mir verricht vnd vertaidinget hat vmb ein inzicht darvmb mir ein wis in meinem gericht ze Regensstavffe gevallen, was fvr ein fraidiges g/ut daran weillent ein tail het fra/we Tvt von Wvtzenhofen vnd irev chint, vnd hat avch Chvnrat der Rossezagel avzpracht, daz dieselben wis vor f/vmftzehen jar sein pfant ist gewesen, die mir darvmb gevallen was vnd darvmb hat sich der vorgenant Chvnrat der Rossezagel ze dvrchsl/acht mit mir verricht vnd vertaidinget als verre daz ich noch anders niemant von meinen wegen noch dehain mein nachchomen von dez gerichtes wegen darvmb hincz im noch hincz der vorgenanten wis vnd swaz darzv geh/ort, besvcht vnd vnbesvcht, dehain ansprache noch dehain vodrvng nicht mer haben noch gewinnen schol noch enmag, weder mit recht noch an recht, chlain noch groz, f/vrbaz nimmer mer noch anders niemant von meinen wegen. Daz im daz also st/at vnd vnzerbrochen beleibe, dar/vber ze einem vrchvnde vnd ze einer best/atichait, gibe ich im disen brief von dez gerichtes wegen versigelten mit meinem insigel. Dez sint gezevg: Stepfan mein richter ze Regenstavffe, Hainreich der Wyshaie, richtar ze Hailspercht, Vlreich der Wuzenhofer von Wintzer, Chvnrat sein svn vnd Rvpprecht der fronpot ze Regenstavffe, vnd ander erweriger lavt ein michel tail. Daz ist geschehen, do man zalt von Christes gepvrtt drevczehenh/vndert jar vnd darnach in dem f/vmfvndvierczigistem jar dez nochsten sampcztages vor sand Lorentzen tag.