Ich Hanns der M/vnich der fleischakcher, burger zu Regens(purch), ich Kathrei sein hawsfraw, ich Margret vnd Elspet sein tochter :I veriehen vnd bechennen offenlich mit dem brief, daz vns her Martein der Gebenpekch, an der zeit maister des spitals sand Kathrein an dem fuezz der prukk zu Regens(purch), vnd gemainleich di samnung daselben mit rat, willen vnd wissen der herren vom chore vnd vom rat ain irs spitals aignew hofstat, di gelegen ist zu Regens(purch) vnder den fleischtischen zwischen dez Vokchen fleischpankch vnd zwischen Herman des Pawtel saligen haws, recht vnd redleich verlihen vnd lassen habent zu vnser vier leiben fridleich vnd freileich ze besiczzen, zu niessen vnd zu n/uczzen, di weil wir leben nach leibtings recht mit der beschaiden, das wir vorgenant vier leib, in der gemein oder in der besunder, vnd vnser nachkomen oder wer dy vorgenanten hofstat ie dann von yn ynn hat vnd besitzet in i/arleich zu zins geben sullen sechs schilling der langen Regenspurger pfenning ie an sand Haymerams abent oder an seinem tag, allzeit g/ut pfenning Regenspurger mvnss, di dann gib vnd g/ab sind nach purkchrecht. Si habent auch vns di genad vnd beschaiden getan, daz si vns ie ainen lebentigen leib wechseln sullen vmb zwelf pfenning vnd einen toten vmb viervndzwainzikch pfenning, als offt wir dez begern, trewleich on geu/ar. W/ar aber das wir obgenant vier leib all von todes wegen abgingen vnd daz wir nicht mer leib w/urben bey vns lebentigen leiben, so w/ar in vnd irm spital dy vorgenant hofstat ledig nach genaden; w/ar auch ob wir in iren zins nicht richten i/arleich zu rechter zeit vnd nach purkchrecht, als vorgeschriben ist, n/amen si des schaden, dez m/ugen si mit sampt irem vorgenanten zins von vns vnd von vnserer hab bechomen mit dem rechten, wann vnd wie si wellent on alle irrung vnd hindernuzz. Vnd daz auch in vnd irem spital daz allez also st/at vnd vnczebrochen beleib, daruber ze vrchund geben wir in den brief versigelt mit hern Martein auf Tunaw, probst zu Regenspurg vnd an der zeit verwes/ar des schultheizzambtz, insigel, daz er an den brief gelegt hat nach vnserer vleizzigen pet, der sach zu einer gezewgnuzz, ym vnd seinen erben vnenkolten. Darvnder wir vns vnuerschaidenlich verpinden mit vnsern trewn st/at zu halten, waz an dem brief verschriben ist. Daz ist geschehen nach Christi gepurtt drewzehenhvndert jar vnd in dem fvmfvndnewnczigistem jar dez montags zu mittervasten.