Ich Offney dy Pfannerynn, burgerinn zu Regenspurg, verich offenlich mit dem brief, daz mir der Liebhart, :I zu den zeyten mayster des spitals zu sand Katrey an dem fusz der br/ukk zu Regenspurg, mit rat vnd wissen der samnung vnd auch meiner genadigen herren vom chor vnd vom rat, dy des spitales pfleger sind, des spitauls aign[e]w hofstat, dy gelegen ist ze osten bey der purkchmawr, ze n/achst an dem spitaulhof, lassen hat zu rechtem leibting fridlich vnd vreileich zu besiczzen auf mein ains leib lebtag vnd nymands mer mit der beschaiden, daz ich dem spitaul mein lebtag allw jar j/arlich dauon zu zins geben sol zwelf pfenning Regenspurger m/unzz, ye sand Haymerams abent oder an seinem tag oder darnach in den n/achsten acht tagen mit der zwispild nach purkchrecht. Man hat auch mir dy beschayden getann, daz ich den pr*unn, der zu den spitaulhof geh/ort, mein lebtag schepffen vnd n/uczen mag an geuer /uber den zaun, der f/ur den pr/unnen gemacht ist, also daz ich in dem spitaulhof nichtes zu schaffen sol haben vnd wann auch man des spitauls v/ich herein ab dem land vervnfrid(et) wegen fl/othnacht, so m/ugen sy es in vnsern tail des hofs vnd der hofstat auch wol slachen vnd triben, als offt in dez not geschiht on all irrung vnd widerred. Vnd wann ich nicht mer enbin vnd von todez wegen abgen, so ist dem spitaul die vorgenant hofstat mit sambt den zimeren, dy dann darauf stend, ze durchslecht ledig vnd loz worden on all ansprauch vnd widerred; allain awsgenomen zwelf schilling pfenning mag ich f/ur dyselben zymer wol schaffen meinem sun oder wem ich wil; vnd wem ich dy schaff, dem sullen sy dy f/ur dy zimer bezalen. W/ar aber, daz dy zymer verbrunnen oder sust abgiengen, so w/aren si auch nichtes daf/ur schuldig. Vnd des alles zu vrch/und gib ich vnd mein sun Vlreich der Pfanner in den brief besigelten mit des erbern vnsers richter hern Hannsen des Gumpprechs, zu den zeyten schulthaizz czu Regenspurg insigel, daz er doran gelegt hat nach vnserer vleizzigen pet der sach zu ainer gezewgnwsz im vnenkolten, darunder wir vns verpinden mit vnsern tr/wen on geuer. Daz ist gesch/achen nach Christi gebwrt drewzehenhundert jar vnd in dem sibenvndnew[n]czigistem jar des n/achsten mantags vor Bartholomey.