Wir Nycla von Gotes gnaden, pischof ze Regenspurch, enbieten den gaistlichen laeuten, dem maister, :I den brudern vnd den swestern des spitals ze Regen(spurg) auf der prukke vnseren vaeterlichen gruz in Got. Wan ewer leben vnd ewer wandelung besunderlich vnd vorderlich auf di werch der parmhertzichait gesetzet vnd gestiftet ist, daz ir der sichen des spitales phlegen vnd warten s*ult, darvmb ir f/ur disen arbait wartent seit des ebigen gemaches, so biten wir euch allesamt vnd monen euch in der lieb vnsers herren Jesu XPI, daz ir mit allem vleizze willichlich vnd demutichlich den armen dienen welt, des wellen vnd sullen wir niman vbertragen, er sei bruder oder swester; also daz di bruder, di auf den hofen sint oder auf dem land daz almusen bitent, endelich vnd mit gantzen trewen des spitals geschaeft vnd nutz werben vnd wider antwurtten; swelich auch dahaim in dem spital sint, div svln1 den sihen vnuerdrozzenlich z*vsehen an allen sachen, besvnderlich di swester svllen den armen dienen ze ezzen, ze trinchen, ze petten vnd ze waschen, des wel wir dehein swester /vbertragen oder ledich sein. Swelhev des niht tvn wolt vnd wider waer, an chranchait des leibes, der sol der maister ir phr/und auflegen, als lang si ez widerredet, oder anders vestichlich puezzen. Ez sol auch der maister alle iar zw/ir raitten vor den brudern, daz ist in achtagen vor oder nah sand Georgen tag vnd in acht tagen vor oder nach sand Martenis tag, von aller g/ult des spitales, di er danne in genommen vnd auz gegeben hat. So s*ullen di vnderen amptlaeut, chellner, chastner , sichmaister oder swer si anders sint alle drei stvnt raitten in dem iar vor dem maister vnd vor den br/udern, di danne sint in dem hause ze phingsten, ze sand Marteins tag vnd ze mitterrvasten oder in achtagen vor oder nah von allem dem, daz zv ir ampt geh/ort. Vnd waer der maister oder der anderen amptlaeut iemant siech oder auzze in des spitals geschaefte, der sol darnach, swenn er widerchumt an dem gesunt oder von dem lande, in acht tagen sein raittung f/urbringen als vorgeschriben stet. Der maister sol auch alle iar selber, ob in nicht irret ehaft not, auf des spitals h/ofen, besvnder der di br/uder phlegen, den getraid zwir schawen vnd achten, des ersten in dem eher auf den akchern e vor dem snite vnd danne in dem stadel als man ez drischet vnd sol darnah der br/uder raittung zehant verh/oren vnd in nemen. Wir gebieten auch vestichlich den brudern vnd den swesteren, daz si in di stat nicht gen an redlich sache vnd an des maisters vrlaub, besvnderlich vor dem ezzen vnd nach vesper. Ez sol auch dhein pruder gen ze sprachen zv den swesteren in ir haus an mit einem anderen bruder vnd durch endlich geschaeft, daz si arger rede vnd archwans ledich sein, daz dem spital schaden braeht. Ez ist gesatzt an ewrer regel vnd ist der grosten lid eines des gaistliches lebens, daz ir niht aigenschaft haben s*ult; da gebiet wir, daz der maister des spitals alle leipting, di br/uder oder swester habent, inne hab vnd in nemen vnd di persone, den si gegeben sint, davon besorgen vnd besehen g/utlich nah ir notdurft vnd nah siner beschaidenhait. Wir haben auch vernomen, daz an dem gotsdienst datz dem spital gebresten ist. Davon setze wir vnd wellen, daz di chapplan vnd di sch/uler vnd di anderen diener des spitals, di darz/v geh/orent, alle tag singen mit note metten, vesper vnd messe vnd ander tagzeit mit ein ander in der chirchen singen oder sprechen ze rehter zeit. Si s/ullen auch alle tagzeit singen niht sprechen ze heiligen zeiten, an den veyertagen; vnd s*ullen auch di br/uder vnd di geswester alle samt mit andaht sein alle tag ze metten vnd ze vesper, si sein danne von der sichen geschaeft vnledig; auch s/ullen si bei anderen tagzeiten sein, swann si m/vgen vor redelicher vnm/vzze. Wir gebieten auch vestichlich, daz di bruder in ir refenter dheinen auzman, swer der sei, laden oder lazzen ezzen f/urbaz mer, vnd daz sullen auch di swester halten. Vnd sol ieder bruder vnd iedev swester irr rehten phrunt gen/vgen, dev von dem hause gedient wirt, also daz niemen besvnder ezzen oder trinchen haben s/ol in dem refenter, er sei dann chranch, der sol auch in dem sichaus ligen. Ir s/ult auch gaentzlichen in dem refenter, die weil man ze tische sei, ewer sweig behalten vnd in der chirchen vnder messe vnd vnder aller tagzeit vnd alle stunt in dem slafhaus, daz di nieman breche. Wir verbieten auch allen br/uderen haben mezzer vnd swert, daz si di f/urbaz icht f/uren in dem land noch in ir celle haben. Si s/ullen auch an allen iren menteln, swi si gestalt sein, in ir hause oder auzwendich vnder wegen, ir gewonlich zaichen f/uren vnd an daz niht reiten noh gen. Ez s/ullen auch disev gesaetz an ewer regel nicht schadens noh wandelung machen, si beleib staet bei ev als si geschriben stet. Vnd daz ir disev gesaetz, di wir durch des hauses nvtz vnd frvmen vnd durch ewer ere vnd saelichait an disem brief in taevtsch, darvmb daz ir ez alle verstet, geschriben vnd gesant haben, f/urbaz staet vnd vnverwandelt haltet, daz gebiet wir ev vestichlich bei der heiligen gehorsam. Der brief ist gegeben nah Christes geburt vber tavsent iar, dreuhundert iar, in dem sechtzehenten iar an sand Marteins tag.