Ich Jordan der Viehofer vergich offenleich vnd tven chunt allen den, di disen prief ansehent oder horent lesen, daz ich getaidingt vnd verscaiden han zwissen pruder Frid(reich), dez maister in dem spital ze Regens(purch) vnd mair Eppen von Achbach vmb den schaden als der Epp sach den er auf dem hof genomen het von prantt vnd swaz er auf div hofstat gechimert hat, hauz, stadel chlain oder gr/os daz schol allez sleht sein zwissen dez maister vnd mair Eppen, daz mair Epp noch chain sein erb auf den vorgenanten hof ze Achbach nihtz eniht ze sprechen habent, weder vmb chimer daz er auf dez hof gechimert hat noch vmb chlain noch vmb grozz, vnd swen sein der maister niht geraten wil, so schol er von dem hof varen vnd alle widerred vnd on allen chriech, daz er noch chain sein erb darauf niht ze sprechen haben als vor geschriben stat vnd darvmb hat im der maister lozzen zwai schaf rokken vnd zwai schaf habern vnd ain schaf rokken stet in dez maister hant ob er ims lozz oder niht. Daz iz also stet beleib vnd vnzeprochen gibt mair Epp disen prief versygelten mit hern Jordans dez Viehofer insigel der sein schiedman ist gewest, vnd dez sint zevg: Vlr(eich) von Ylpach, mair Eppen aydem, Wernher von Hoflein vnd Chunr(at) von F/vrholcz vnd anderr frumer la'vt genuech. Daz ist geschehen do man von Christes gepurt zalt drivzehenhundert jar in dem fwnfzehenten jar dez ertages nach dem christtag.