Fridericus dei et apostolice sedis gratia Ratispon(ensis) ecclesie episcopus universis abbatibus, prioribus, :| decanis, plebanis ac aliis ecclesiarum rectoribus per predictam nostram dyocesim constitutis salutem et sinceram in domino karitatem. Innotuit nobis, quod quidam ex vobis dilectos in Christo fratres hospitalis nostri Rat(isponensis), cuius promociones favore prosequimur speciali, ad vos pro colligendis elemosinis venientes occasione aliorum collectorum seu petencium interdum repellunt et admittere contradicunt, vel si quando admissi fuerint tam per vos quam ecclesiarum vestrarum procuratores, qui Zechmaister nuncupantur, inmoderata porcio requiritur et recipitur ab eisdem. Quare vobis universis et singulis in virtute sancte obediencie et sub pena suspensionis officiorum vestrorum precipimus firmiter et districte, quatenus non obstante qualibet suspensione collectione elemosinarum quocumque tempore per nos facta vel facienda, seu eciam alio quolibet petente exceptis nunciis nostre kathedralis ecclesie, quos omnibus aliis preferri volumus et ipsos fratres decetero quandocumque semel in anno puta in quadragesima vel alio tempore ad vos venerint, admittere debeatis. Nec eciam collectarum per eos elemosinarum aliquam recipiatis, vel per predictos procuratores permittatis recipi porcionem, nisi de ipsorum bona et spontanea voluntate vobis vel eisdem fuerit erogatum. Si vero dicti Zechmaister desistere noluerint a requisicione talium elemosinarum seu porcionum earundem eos ad hoc per subtractionem divinorum per vos compelli volumus et artari. Prefatum enim hospitale per vos tanto maiori diligencia diligimus et petimus in suis negociis omni tempore promoveri, quanto eidem forcior incumbit necessitas ex multitudine, qua saepe deprimitur infirmorum. Nos igitur omnibus vere penitentibus et contritis qui infirmis predicti hospitalis suas elemosinas dederint XLa dies iniuncte eis penitencia misericorditer in domino relaxamus. Ratas et gratas habentes omnes indulgencias a quibuscumque archiepiscopis et episcopis predictis infirmis traditas eta concessas presentibus usque ad nostram revocacionem valituris. Datum Rat. in vigilia kathedrae sancti Petri, anno domini millesimo CCCo LVIImo.