Ich Vlreich der Hochenwartter, mein hawsfraw vnd all vnserer erben, bechennen offenleich mit dem brieff allen den, die in ansechent, h/ornt oder lesent, das wir vns liepleich vnd frewntleich verricht vnd vertaidingt haben nach erberger herren rat, auf ein gantz ende vmb all ansprach, st/oss, zwil/aff vnd voderung, dy wir hintz dem erwirdigen hern gehabt haben, her Pawlsen von Althaim, z/u den zeiten maister des spitals sand Kathrein an dem f/uzz der prukchen z/u Regens(purch) vnd /vberall mit dem convent der sampnung doselbs, von des g/utz wegen, das gelegen ist z/u Steten, do ich egenant Vlreich Hochenwartter etwa vil aufgepawet vnd gezimert h/an, wie das alles genant ist, mit der beschaiden, das wir noch vnsrer erben noch anders yemand von vnsern wegen vngeverlich darauf noch darnach, hintz in selbs noch hintz dem egenanten spital, noch hintz iren l/awten vnd g/uten swelicher herrschaft vnd gepiet sy dy habent, dhain ansprach noch voderung nicht mer haben noch gewinnen s/ullen noch enm/ugen vmb dy egenant vertaidingten sach, weder mit gaistlichen noch wertlichen rechten noch an recht in dhainer andern weis, an alles gew/ar. Ez ist auch ze wissen, das wir egenanten erben etleich brief gehabt haben, dyselben brieff lawtten vnd sagten vmb etwa vil /achker, dy zinshaft solten sein auf des egenanten spitals aigen g/ut z/u Steten, dyselben briff alle s/ullen all ab vnd tod sein vnd dhain chraft wider den gagenburtigen brieff nicht haben, w/ar aber, das wir oder niemant anders von vnsern wegen, mit in oder irem egenanten spital darumb chriegen oder rechten wolt, dyselben chrieg vnd recht, wie die genant w/aren, s/ullen sy gewunnen haben an aller stat vnd wir verlorn. Das dem egenanten spitalmaister, dem spital vnd allen iren nachkomen das alles st/at, gantz vnd vnzerbrochen beleib, des z/u vrchund vnd bestatichait gib ich obgenant Vlr(eich) Hochenwartter in den brieff mit meins gn/adigen herren, her hansen des H/achkel, an der zeit gesessen z/u Stokkenfels, insigel versigelten, der ez durch meiner vleissigen pett willen an den briff gelegt hat, der sach z/u einer gez/uchn/uss, im vnd seinen erben on sch/aden, darvnder ich mich verpinde, fur all mein erben, mit meinen trewen st/at z/u haben vnd volf/uren, swas an dem brieff verschriben ist, trewlich on geu/ar. Der sach sin z/ugen vnd taidinger, mein egenant gnadiger herr, her Hans der H/achkel, Vlreich Ch/vttenawer burger z/u Regens(purch) vnd Vlreich der Pakkenrewtter z/u den zeiten bereiter des egenanten spitals z/u Regens(purch). Datun et acten sub anno domin millemo CCCCmo in vigilia sancti Martini episcopi.