Ich Perchtold der Metherer von Abach, mein hausfraw vnd all vnser erben wechennen offenlich mit dem brief allen den, dy in ansehent oder h/orent lesen, vmb dy aufl/awff, z/uspr/uch vnd vodrung dy wir gehabt haben hincz dem spital sand Kathrein an dem f/usse der prukk ze Regens(purch) vnd irem aygen hof z/u spital Abach vnd daz spital der spitalmeister vnd sein pfleger her wider hincz vns wie sich daz alles verlawffen vnd ergangen hat, nichcz ausgenommen vncz auf disen h/ewtigen tag darvmb sey wir nach vnserr fr/ewnt vnd andrer erberiger l/awt rat mit her Vlreich dem Kuttnawer, spitalmaister mit dem spital vnd seinen pflegner z/u Regens(purch) lyplich vnd fr/ewntlich wericht, vertaydingt vnd verschaiden worden auf ein gancz ende daran vns wol gen/ugter, darnach hat vns der obgenant spitalmeister dy frewntschaf vnd genad getan vnd habent vns den obgenanten hof z/u spital Abach lassen vnd was darz/u geh/ort z/u veld vnd z/u dorff, wesucht vnd vnbesucht f/ur ein freys ledigs g/ut daz wir den f/urbas ynne haben vnd p/awn s/ullen vnd wellen wo om dez not ist an allen iren schaden vnd gepresten, ausgenommen dy holczmarch dy darz/u geh/ort, da s/ullen wir nichcz mit ze schaffen noch ze handeln haben. Dann was wir prennholcz vnd z/awnholcz z/u dem vorgenanten hof wed/urfen daz s/ullen wir weschaidenlich nemen an geu/ar vn s/ullen auch dez holcz trewlich h/uten vnd worten an allez geu/ar. Wir s/ullen auch in j/arlich von dem vorgenanten hof dinen vnd geben ir g/ult nach wesch/awng nach irs salpuchs sag mit sampt dem chlainem dinst vnd wisgelt daz davon geh/ort z/u rechter zeit als andrer herren dinst vnd g/ult recht ist, an allen abgankch vnd s/ullen in dy j/arlich antwurten gein Regens(purch) in daz spital auf iren chasten wo sy hin wellent an all widerred, wir s/ullen auch j/arlich in ir stift ch/omen mit in stiften vnd ir stift recht t/un als ander ir mair an widerred, vnd swelhes iars wir dem egenanten spital sein g/ult nicht g/anczlich richten vnd wertten mit sampt dem wisgelt vnd den chlainedinst oder daz wir den ogenanten hof nicht p/awlichen pawten vnd wesenlichen stelten z/u veld vnd ze dorf oder in dheinerlay /vberf/uren daz an dem brief verschri(ben) ist, so mag daz obgenant spital oder wer dann spitalmeister ist, den oftgenanten hof z/u Abach vnd was darz/u geh/irt, wesucht vnd vnbesucht, lassen wem sy wellent, daz wir darauf noch darnach weder vmb zimer noch vmb pawrecht noch vmb chain ander sach wie si genant ist nichcz ausgenommen f/urbaz nichcz zu badern noch ze sprechen haben s/ullen noch m/ugen, chlain noch groz, weder mit recht noch an recht noch anders niempt von vnsern wegen in dheiner weis, t/aten wir dez nicht, swelhen schaden sy dez nement, den s/ullen wir in gar vnd gancz ab t/un vnd widerchern vnd s/ullen auch den haben auf vns vnd auf aller vnsrer hab wo wir dy haben oder wie dy genant ist, vnd s/ullen vnd m/ugen dez davon wech/omen mit gaistlichem oder wertlichem rechten swann vnd wie sy wellent an all vnser irrung vnd hindern/usse vns waz wir oder anders iempt von vnsern wegen dar/vber mit in chriegten oder rechten, daz geben wir in alles gewunnen vnd wehabt vnd vns verloren an aller stat. Dez z/u vrch/und geben wir in den brief versigelten mit herren Chalhoch dez Hofer, z/u den zeiten pfleger z/u Regenstauff, insigel der es an den brief gelegt hat nach vnsrer fleizzigen pet, im vnd seinen erben vnenkolten vnd an schaden, darvnder wir vns verpinden mit vnsern trewen st/at zehaben waz an dem brief verschriben ist, trewlich an geu/ar, dez sin zewgen vnd t/adinger gewesen: Dytreich Prew purger in der vorstat z/u Regens(purch), Albrecht Smid z/u Gr/untal, Hainrich Smid z/u Irlpach vnd Charl vnd Ott Metherren mein pr/uder vnd ander erber l/awt gen/ug. Daz ist geschehen nach Christi gep/urtt drewczehenh/undert jar vnd in dem dr/ewvndn/ewnczigisten jar dez eritags nach reminiscere in der vasten.