Ich Peter der Schawr von Abensperch, bechenn offenlichen mit dem brief f/ur mich, f/ur mein hawsfrawn vnd f/ur all mein erben, das ich ettleich :I ansprach vnd vodrung gehabt han von des spitals, wegen hintz dem ersamen vnd weisen her Pawlsen von Althaim, z/u den zeiten maister des spitals z/u sand Kathrein, gelegen an dem f/uzz der prukk z/u Regens(purch), vnd gemaintlichen hintz dem convent daselben, vmb ettlich gelt das hinder im gelassen hiet in demselben spital, mein vetter s/aliger C/unrat der Schawr, dem got gnad, derselben ansprach vnd aller voderung, wie dy genant ist gewesen, nichtz ausgenomen noch hindan gesetzt, vntz auf den tag hewt pin ich obgenanter Peter von Abensperch, von meinen wegen vnd von aller meiner fre/wnt wegen, dhainer hindan gesetzt, dy ietzo sind oder noch in k/unftigen zeiten werdent, vnd der obgenant her Pawls von Althaim von des spitals wegen, gentzlichen gegangen hinder den erwidirgen vnd weisen gaistlichen herrn her R/ugern, abt des closters z/u Pr/uflingen, vnd Vlrichen den Hauttinger, an der zeit gesessen z/w alten Eglozheim, dy baid darumb ausgesprochen haben, daran mich obgenanter Peter der Schawr von Abensperch vnd den obgenanten her Pawlsen von Althaim vnd das spital wol ben/ugt, alz verer vnd alz fr/ewntlich, das ich obgenanter Peter von Abensperch noch anders niemand von meinen wegen, hintz dem obgenanten spitalmaister, hintz dem spital noch hintz aller seiner hab, wo ez dy hat oder wie dy genant ist, clain oder gross, bes/ucht vnd vnbes/ucht, f/urbas ewiclichen dhain ansprach noch voderung nicht mer haben noch gewinnen s/ullen noch m/ugen, vil noch wenich, weder mit gaistlichen noch wertlichen rechten noch an recht, in dhainer weis. Es ist auch gerett vnd ausgesprochen worden, ob dem egenant maister, her Pawlsen von Althaim, oder wer dann ie maister ist, oder dem spital hinf/ur icht sch/aden aufst/unden von ettlichen meinen fr/ewnten oder erben, wie dy genant w/aren, also das dem anspruch nicht geleich w/ar, wie der schad genant w/ar, des sol das egenant spital wartent sein auf aller mein hab, wo ich dy h/an oder wie dy genant ist, clain oder grozz, bes/uchtz vnd vnbesucht, nichtz ausgenomen, on all widerred. Daz dem egenant spitalmaister vnd dem spital, vnd allen iren nachk/omen, das alles st/at gantz vnd vnzerbrochen beleib, des z/u vrch/und vnd best/atichait, gib ich obgenanter Peter von Abensperch in den brief, mit des weisen vnd vesten meins gn/adigen herrn, her Jobsten von Abensperch insigel versigelt, der ez durch meiner vleissigen pett willen an den brief gelegtt hat, der sach z/u einer gez/uchn/uzz, im vnd seinen erben vnencholten vnd an sch/aden, darunder ich mich verpind f/ur mich vnd all mein frewnt vnd erben mit meinen tr/ewen st/at z/u haben vnd volf/uren was an dem brieff verschriben ist, trewlich on alles gev/ar. Des sind taidinger vnd zewgen dy obgenanten schidlawt vnd meins gn/adigen herrn, her Hans, des egenanten von Pr/uflingen capplan, vnd der beschaiden Vlreich der Pakenrewtter, an der zeit bereiter in dem obgenanten spital, vnd ander erberger l/awt gen/ug. Daz ist geschechen nach Cristi gep/urd viertzechenh/undert jar an sand Haymrans abent des lieben hailigen.