Ich (R/uger) der Rot von Gr/untal mein hawsf(rawe) vnd vnser eriben, bechennen offenlich mit dem :I brief ect., das wir nach rat, haiss, gunst vnd g/utem willen alle vnser erben vnd frewnt vnd andrer erberger la/wt frewntlich vnd liebleich /vberain worden sein auff ein gantz ende mit dem erbern vnd gaistl(ichen) herren, her Paulsen von Althaim, an der zeit maister des spitals sand Kath(rein) an dem f/uzz der pruchken z/u Regens(purch), vnd /uberall mit der gemain doselben vmb all handlung vnd vordrung dy ich im (.?.) von des egenanten spitals wegen gehabt han wie dye genant sind, vnd bes/under von des hawss wegen das ich gepawt vnd gepessert h(an) auff des egenanten spitals aigen hoff zu Gr/untal, daran mir mein egenant gn/adiger herr, her Pauls(en) von Althaim ze st/ur vnd z/u hilff bech/omen ist, mit einer summ geltz die ich im vnd dem spital schuldig worden bin von versavmn/uss wegen meiner g/ult; dyselben summ geltes er vnd das egenant spital mir vnd meinen erben gantz vnd gar lassen han vnd ledig gesagt hat, also das ich, mein hausf(rau) noch all vnser erben auf den egenanten hoff z/u Gr/untal, von des paws wegen darnach nichtz mer ze sprechen haben noch hinf/ur ink/unftigen zeiten gewinnen m/ugen noch anders niemant von vnserm wegen, clain noch gross, furbas nimmer mer; vnd ob wir dar/uber mit in kriegteten oder rechtent, mit recht oder on recht, daß geben wir in gegen vns an alle stat behabt vnd vns verloren. Ez ist auch ze wissen all dy weil vnd zeit wir oder vnser erben das egenant g/ut verdienen m/ugen gegen dem egenanten spital, so sol vnd wil vns der egenant her Pauls von Althaim oder wer dann ie maister ist, die gnad tun, vns das g/ut ze lassen mit allen eren, rechten vnd n/utzen als es mit alter g/ult her bechomen ist, nach irs salb/uchs sag.