Ich Liebhart von Wisendorf vnd mein hausfrow vnd vnser paider erben, wir veriehen offenbar an disem brief allen den, die in ansehent oder h/orent lesen, daz wir vns frevntlich vnd lieplich vertaidingt vnd verriht haben mit vnserm herren dem maister des spitals ze Regenspurch enhalb der pruk vnd auch mit haus vmb vnsern hof ze Wisendorf den wir in auf haben gegeben, also mit der beschaidenhait, daz si in vnserm br/uder Chvnr(ad) habent lazzen vncz hincz liehtmesse dev nu schirst ch/omt, daz er in pawen sol vnd inn haben in allem dem rehten als wir in selb gepawen vnd inne gehabt haben mit allen n/vtzen, vnd dann nach liehtmesse in ener virczehen tagen oder vor in virtzehent tagen sch/ulle wir selb wider auf egenanten hof varn vnd siczen vnd sch/ullen in dann wider inne haben vnd pawen in allem dem rehten als wir in vor gepawet vnd inn gehabt haben. Ez wa'r dann als vil, ob wir von dem vorgenanten spitalmaister vnd auch von dem havs mit pet oder mit gvnst mohten gehaben vnd gewinnen, ob wir selber auf den egenanten hof niht m/ohten gevarn oder niht wolten, daz wir dann vnsern pr/uder auf dem hof liezzen sitzen vnd pawen in allem dem rehten als wir in selb gepawet vnd inn gehabt haben, wa'r aber daz si vns des niht wolten g/unnen, so s/ulle wir selb auf den hof varn vnd sitzen, vnd sch/ullen den pawn in allem rehten als vor verschriben ist, gescha'ch aber des niht, daz wir auf den hof niht enf/uren vnd darauf beliben, so habent sich allev dev reht die wir auf den hof haben vervallen, daz wir f/urbaz chain ansprach darnach niht enhaben mit chainerlaye sachen. Vnd daz in daz allez daz vor verschriben ist sta't vnd vnzebrochen belib, dar/vber zu einem vrch/vnd geben wir in disen brief mit hern Alb(ert) von Saulberch richter ze Strawbing vnd mit hern Karels des schreiber in dem vicztvmampt insigeln versigelt, wan wir selb chain insigel haben vnd wan si der sache auch vnser taydinger sint gewesen. Der brief ist gegeben anno domini millesimus CCCo XXXIo in die sancti Pangracii martirie.