Ich Tut, Hainreichs des alten maisters witib von Ka'rrein, dem Got genad, vnd ich Hainr(eich) :I ir svn vnd alle vnser erben veriehen vnd tun chunt allen den, di disen brief ansehent oder h/orent lesen, daz vns di erberigen herren, pruder Albreht der maister vnd der conuent in dem spital sant Katerein, daz gelegen ist an dem f*uzz der pr*uck ze Regens(purch), verlihen habent zwen weingarten, gelegen ze Ka'rrein, di der vorgenant Hainr(eich) der maister von in het mit hofstat vnd mit a'ckern vnd mit allem dem, daz darzv geh/ort, besucht vnd vnbesucht, also mit der beschaiden, daz wir vnd vnser erben vnd affterchomen, di ie z(e) den zeiten di vorgenanten weingarten innehabent, davon ze zinse sch/uln geben hincz dem vorgenanten spital alleria'richleich f/unf aymer weins des pesten, der an denselben weingarten wechset; vnd swenn auch wir lesen wellen, so sch/ul wir iz den egenanten herren vnd iren nachchomen vor ze wizzen tun, daz si iren poten dazv senden, daz der dapei sei; vnd sch/uln sev derselben f/unf aymer weins weren ab dem gepiet e wir anders ihtsiht davon p(ri)ngen oder geben. Ta't wir oder vnser erben vnd affterchomen des nicht, so sch/uln sich ellev vnserev recht an den oben genanten weingarten mit allem dem, daz vorbenant ist, gar vnd ga'nczleich veruallen haben, vnd swelhes iars nicht weins w/urd, von swev daz gescha'ch, so sch/ul wir in desselben iars ie f/ur den aymer weins zwenvnddreizzik Regens(purger) pfenning geben auf sant Merteins tach der darnach schirst ch/vmt, der pfenning, di denn gib vnd ga'b sint ze Regens(purch) in der stat. Auch schol man wizzen, ob nicht mer w/urd an den mergenanten weingarten denn ain aymer oder zwen weins, mer oder minner, den sch/ul wir den vorgenanten prudern vnd iren nachchomen geben an irem egenanten zinse; vnd swaz in denn an demselben zinse abget, des nicht worden ist, da sch/ul wir in pfenning f/urgeben, als vor beschaiden ist. Ta't wir oder vnser erben vnd affterchomen des alles nicht, so sch/uln sich ellev vnserev recht, dev wir haben an den vorgenanten zwain weingarten vnd an allem dem, daz darzv geh/ort, besucht vnd vnbesucht, gar vnd ga'nczleich veruallen haben, daz wir chain recht noch chain ansprache darauf noch darnach afftermolen nimer mer sch/uln gehaben. Des sint gezeug: her Vlr(eich) der schreiber vnd her Hainr(eich) der Haituolch, purger in der vorstat ze Regenspurch, vnd Vlr(eich) der Wuzenhofer vnd der Englbreht, hausgnozzen ze Winczer, vnd andrer frvmen la*wt gen/unch. Daz auch daz den pr/udern von dem vorgenanten spital also sta't vnd vnzebrochen beleib, dar/vber ze ainem vrch/und vnd ze ainer besta'tichait geb wir, als wir vorgenant sein, in disen brief versigelten mit des erberigen mannes, hern Herweigs von Aw, richter in der vorstat ze Regens(purch) insigl, darvnder wir vns verpinden vnd alle vnser erben vnd affterchomen pei vnsern trewen allez daz ze volf/uren vnd sta't behalten, vnd laisten, daz vor an disem brief geschriben stet. Daz ist geschehen, do man zalt von Christes gep/urtt drevzehenhundert iar vnd in dem ainenvnddreizzigsten iar an sant J/orgen tag.