Wy Hans van Sauwinge unde Cord van Bevelte de jungere bekennet openbare in dusseme breve vor uns unde unse erven, dat wy van deme ersamen rade der oldenstad to Hildensem hebben upgebord unde tornoge entfangen van wegen des erwerdigen in god vader unde heren, hern Ludelffe bisschuppe to Ozel, sesseundeseventich gude Rinsche gulden, de ome by deme obgenanten rade in dusseme neystvorgangen jare to ver tyden, alze to Passchen, to sunte Johannis dage to Middensomer, to sunte Michaelis dage unde to Winachten, jo tor tyd negenteyn gulden, bedaget weren, unde wy laten den vorbenomden rad to Hildensem sodanner vorscreven bedageden renthe van wegen des obgenanten unses gnedigen heren van Ozel quid, leddich unde loss unde willen se van derweghen schadeloss holden unde benemen aller ansprake van alßweme. Ok so wille wy deme benomden rade to Hildensem darvor gud sin, dat de obgenante unse gnedige here van Ozel to der tyd in deme levende was, alze de vorscreven jarighe renthe bedagede, unde weret, dat he to den tyden alse de vorscreven renthe bedagede, in deme levende nicht gewesen enhedde unde de obgenante rad to Hildensem des tor warheit queme, was wy denne van sodanner vorscreven jarigen renthe van deme obgenanten rade to Hildensem tovele upgebord unde entfangen hedden, dat wolde wy one to stunt wedder antworden unde handelagen sunder jennigerleye insage. Dyt love wy Hans van Sauwinge unde Cord van Bevelte vor uns unde unse erven deme vorbenomden rade to Hildensem in guden truwen stede unde vast to holdende sunder alle lyst unde hebben des to bekantnisse unse ingesegele an dussen breff hengt, na goddes bord Verteynhundert jar darna in deme eynundevefftigesten jare, ame daghe sancti Gregorii pape.