We de rad der stad Hildensem bekennet unde betuget openbare, dat vor uns quammen Eggerd Myge, Hinrick Munzel, Hermen Bryng unde Anneke, wedewe Eggerd Mygen, unde scholden undertwisschen over itliken goideren, de Anneke vorbenomd under sek1 hadde, dar Eggerd vorbenomd, Greteke unde Geseke sine sustere, der benomden Hinrick unde Hermans elike husfrouwen, itlike rechticheyt alse van ervetals wegen Eggerd Mygen ores vaders meynden ane to hebbende unde to beredende. Alse nu de vorbenomden clage unde antworde vor uns vorludet hadden, satten se dat an beydent siden by uns, se darover to vorschedende. Des so hebben wy se darover gescheden in dusser wys, weret, dat Anneke vorbenomd, dar benomden Eggerdes, Greteken unde Geseken steffmoder, jennige goydere under sek hadde, dar se jennige rechticheyt alse van arvetals wegen ane meynden to hebbende, so schal de eyn jowelk bynnen sesß weken unde dren dagen inbringen, was malkem utgebracht hedde, edder seggen de benomden Anneken sodanner ansage, alse se van derwegen to ore meynden to hebbende, leddich unde losß. Aldus so seden de benomden Eggerd, Hinrick unde Hermen vor sek1, Greteken unde Geseken ore benomden husfruwen unde ore erven sodanner ansage unde rechticheyt, alse se van derwegen to ore meinden to hebbende, quyd, leddich unde losß unde deden dat in unser jegenwardicheyt eyne gantze rechte vorticht, utbescheden, was one van lehengoyderen unde redegoyderen in rechte angevallen unde boren mochten, des wolden se hirmede unvortichtiget weßen. To bekantnisse dusser stugke hebbe wy unser stad ingesegel an dussen breff hengt, na goddes bord Verteynhundert jar darna in deme sestigesten jare, ame fridage neyst na sunte Valentinus dage.