Wy mestere, olderlude und ganttze ghemeinen warcken der becker bynnen Hyldensem bekennet openbare in dussem breve, dath wy van den olderluden Unserer Leven Fruwen broderschup der beckereknechten und sust van den knechten darmede thogheschickt sesstich lutke pund, so bynnen Hyldensem gewonthligen ghinghe und gheve sin, upgenomen und entfangen hebben und de forth in unses amptes fromen wythligen ghekarth, wurvore wy den benompten olderluden, oren nakomen edder deme holdere dusses breves myth orhem guden willen uth unses amptes redesten upkomen und renthen hebben vorkoft twe pund dessulven lutken gheldes, de wy und unse nakomen den genanten olderluden, oren nakomen edder deme holdere dusses breves myth orem guden willen alle jare plichtich sin to ghevende, de helfte uppe Paschen und de anderen helfte uppe sunte Mychaeles dagh beredeligen alle tydt. Doch hebben wy uns de macht beholden, dath wy van unses ampttes wegen alle jare dussen tins wedder affkopen moghen, und wanner wy des ghesinnet, wyllen wy den vorbenompten olderluden edder orhen medegescreven des lose tovorne twischen sunte Johannis daghe to Myddensommere und Unser Leven Fruwen Kruthwiginghe daghe vorkundighen, und welkes jares sodann geschein, denne darna to deme erstkomende sunte Mychaeles daghe willen wy den vorgenanten olderluden edder orhen medegemelten de vorgerorten sestich lutke pund myth allen bedagheden vorseten tinsen, ift der ichtes entseten werhe, guthligen vornoghen und betalen sunder insaghe, und hebben uns dar beneffen wyder vorplichtiget, wanner de vorgenompten olderlude sodan sestich pund up eyn betheres wusten to belegghende, datsulftige schullen se uns eyn half jare thovoren vorwithligen und nha vorlope des halven jares to wonthliger tyd willen wy onhe sodann sestich pund vornoghen. Des to mherer wyssenheyt hebben wy unses ampttes ingezegel ghehenget an dussen breff, na goddes borth Dusent vyffhunderth an deme tweundtwintigesten jare, des daghes sunte Gallen confessoris.