We de rad der stad to Hildensem bekennet openbare in dussem breve vor uns unde unse nakomen, alse umme sodanne rechticheit, de wy van unser stad wegen over mennigen jaren wente an dusse tyd hebben gehat an deme ortstendere der becker huse an deme orde der Hosenstraten an unsem markede belegen, alse dat me dejenne, de des vorschult unde vordenet hadden, an deme vorschreven ortstendere plach to tuchtigende unde to der stupe to slande unde denne de oren, de men one afsneit, daran negelde, des so hebben unse frundes de beckere darumme mit uns fruntliken gedegedinget, so dat wy one to willen sodanne rechticheit, de wy van unser stad wegen an deme vorschreven ortstendere hadden unde bereden mochten, gentzliken hebben affgesecht unde vorlaten, segen aff unde vorlaten in unde mit dussem breve, so dat wy edder unse nakomen van unser stad wegen uppe sodanne rechticheit des vorschreven ortstenders nu effte in tokomenden tyden nicht mer sagen willen noch enschullen in neinerleie wys. Hirvor so willen unde schullen de vorbenomden unse beckere unde ore nakomelinge uns unde unser stad van deme vorschreven oreme huse allejarlikes geven unde entrichten eyne halve mark unser stad weringe ewiges erventinses, unde des de helffte uppe Paschen unde de anderen helffte uppe sunte Michaeles dach beredeliken alle tyd. Dusses to bekantnisse hebbe wy unser stad ingesegel an dussen breff hengt na goddes bort Verteinhundert jar darna in deme vefftigesten jare ame dage sancte Barbare virginis.