Wy broder Johan van Gronawe gardian, Nycolaus Bakestro lesemester, Bertoldus wicegardian, Arnoldus Roscingen, Statius van Else, Hinricus Moller unde ghemeynliken alle de brodere des closters tho Hildensem don widlik alle den, de dessen bref sen, horen eder lesen, wu Johan Resen in gotliker leve unde innychet heft begunt unde maket laten eyn crutz van sulvere, dar broder Bertolt Gerenrot saliger dechnisse bi sineme levende tho schikkede verdehalve mark unde dre lot fyns sulvers, dat me mach umme dragen tho der kerkemisse unde an anderen tyden, tho ewighem blivende bi unsem clostere. Unde wert, dat in korten tyden eder in langen de convent dat vorsette eder vorkofte, so scholdeme des geldes, dar me dat vor vorsette eder vorkofte, vif mark gheven unde antworden bynnen den negesten ver wekennen deme, de dossen bref hedde in siner were. Dat stede unde vaste tho holdende, so hebbe we des tho tuchnisse henget unses closters ingheseghel an dossen bref, na goddes bort vertenhundert jar in deme sestegeden jare, in deme hilgen Palmesdaghe. Unde ik broder Johan Bosingvelte, custer der custodigen tho Halverstat, make delhaftich den sulven Johan Resen vorghenanten umme innigher begeringe willen aller guden werke, de unse salichmeker barmhertichliken werkende is in den broderen unser clostere Halberstat, Brunswik, Hildensem, Honovere, Gosler, Quedelingheburch. Des tho bewisinghe hebbe ik myns ammechtes ingheseghel ghehenget an dessen bref, na goddes bort Vertenhundert jare in deme sestegeden jar, in deme hilgen Palmedaghe.