We broder Johan gardian unde de ghemeyne covent der Barvotenbrodere to Hildensem doyn witlik al den, de dessen bref zeyn, horen eder lesen, wu Johan Rese in gotliker leve unde innegheyt heft begont unde maket laten eyn clenode eyner monstransien van zulvere unde vorguldet, dar me den hilghen lichammen unses heren Ihesu Christi mach ume draghen to der kerkemisse unde an anderen tyden, to ewighem blivende by unsem clostere. Unde wered, dat in corten tyden eder in langhen de covent dat vorzette, vorcofte eder vorandere, zo scholdeme des gheldes, dar me dat vore versette, vorcofte eder vorandere, teyn mark gheven unde antworden bynnen den neghesten veer weken deme, de dessen bref hedde in zyner were. Hirumme zo hebbe wy weder toghedelet dem zelven Johane Resen gheystlike gave nach zyner begherunghe, dree ewighe missen in der weken to dem altare des Hilghen Cruces in unser kerken myd eyner ewighen jartyd uppe [...] to begande, des avendes myd vigilien unde des anderen morghens myd missen vor zek unde al zyner lefhovede zele, dar he des vore beghered. Ok do wy delhaftegh dem zelven ghenanten Johanne Resen unde den he des beghered aller gotliken werk unde ovinghe, de god barmhertliken wracht ewich an den broderen unses closters. Desser dingh to ewigher bewisinghe is desse bref ghevestenet myd mynes ammechtes ingheseghele unde des ghemeynen closteres, nach goddes bort Drytteinhundert unde vifundeneghentich jar, in des werde sinte Bonifacies daghe des hilghen merteler.