Wy Bartold van goddes gnaden unde des stols to Rome bisschup to Hildesem unde administrator der kerken to Verden bekennen openbare in dusseme breve vor us unde use nakomen, dat us hebben openbaret laten de bescheden Hinreck Sticke, Henninck Terwen unde Bernd Sinderman, user stad to Hildesem borgers, dat de tuchtige fruwe Ilsebe nagelaten wedewe saliger Hinreck Geysmers, ok borger darsulves, vor orem dode one gegeven unde bevolen hebbe ore nagelaten gud unde in orem testamente bestalt hebbe, to vormerende dat deynst goddes, schullen se funderen unde van nyge stifften eyne ewyge viccarie in de ere der hilgen fruwen sunte Annen to dem altare sunte Annen belegen in sunte Jacobes kerken in unser stad to Hildesem, unde de bewedemen unde begifften myt derdehalff hundert unde sesundetwintich pund Hildensemerscher penninge hovetsummen by der viccarie unde altare to ewygen tyden to blivende, unde dusser vorbenomden viccarie schulle syn de erste besitter Johannes Henne, Hans Hennen sone, borger nu tore tyd wonhafftich to Hamelen, den de genante fruwe Ilsebe myt sek hadde in oreme hus, do se in deme levende was. Vorvelle de genante Johannes Henne van dodes wegen edder sus doch by synem levende de vorgescreven viccarie vorledegede, so scholde se van stunt hebben unde besitten de ersame er Tidericus Azel prester, nu tor tyd viccarius des altares sancti Nicolay in sunte Andreas kerken bynnen Hildesem. Vorvelle ok de benomde Tidericus van dodes wegen, so scholde de vorbenomde viccarie hebben unde besitten er Brunoldus Azel. Wan de denne vorvallen were van dodes wegen, hedde denne de vorbenomde Hans Hennen, wonhafftich to Hamelen, noch eynen sone, de dar bequeme to were, dat he mochte eyn geystlik leen besitten, de scholde denne van stunt der vorgescreven viccarie eyn besitter werden. Hedde over Hans Hennen neynen sone, so wolden de vorbenomden Hinreck Sticke, Henninck Terwen unde Bernd Sinderman patronen syn unde hebben ius patronatus to presenterende eynen geistliken personen, dede prester were edder in dem jare darna prester werden mochte, dene wolden de vorbenomden Hinrik, Henninck unde Bernt presenteren deme werdigen heren deken der vorbenomden kerken sunte Andreese, dede one instituerde unde de collacien dede unde ome de besittinge geve, deme de viccarius denne horsam don scholde, so dat wontlik is. Weret, dat de deken uppe sodan tyd nicht to Hildeseme were, dat denne de viccarius presenteret worde dem seniori des capittels der vorgescreven kerken sunte Andreas, de it denne holden scholde myt dem viccario, so de deken scholde gedan hebben. De sulve viccarius schulle ok vorplichtiget syn, alle weken to holden edder holden laten vor dem vorbenomden altare sunte Annen dre missen, de eynen in de ere sunte Annen, de anderen twe missen schullen wesen selemissen, flitliken in den missen to bydden vor Hinreck Geysmers sele, Ilseben syner husfruwen unde vor alle cristen sele. So vaken ok alse dusse vorscrevene viccarie vorledigede, so wolden de vorbenomden Hinreck, Henninck unde Bernd de wile se in dem sammede levende edder eyn van one presenteren unde hebben ius patronatus. Wan se over vorvallen weren van dodes wegen, so scholde ius patronatus unde de presentacio van stunt komen unde vallen an de ersamen borgermesters unde rad unser vorbenomden stad Hildesem in aller mate unde wise so vorgescreven is, so ok dusse vorgescreven derdehalff hundert unde sesundetwintich punt Hildesemerscher penninge hovetsummen uppe eynen wedderkop belecht syn, so de viccarius van den renten leven schal unde deynst godes aff holden. Worde denne sodann hovetsumme affgekofft, so schal van stunt de viccarius myt witschop unde vulborde der patronen den hovetsummen wedder uppe ewige renthe beleggen, so dat de hovetsumme unvormynnert blive. Des so hebben uns gebeden laten de vorbenomden Hinreck Sticke, Henninck Terwen unde Bernt Sinderman umme goddes willen wy sodann fundacien unde bewedemynge der vorbenomden viccarie unde altars vulborden unde bestedigen willen, unde ok ius patronatus geven unde confirmeren, so dat de vorbenomde Johannes Henne sy de erste besitter der vorgescreven viccarie, na ome er Tidericus Azel, darna er Brunoldus Azel unde denne so vort alse vorscreven is. So wy denne plichtich syn, dat goddesdeynst vort to settende, alse wy gerne don, unde angeseen der vorbenomden Hinreck, Henninck unde Berndes gotlike bede umme goddes willen, so confirmere wy Bartold van user bisschupscher walt wegen alle vorgescreven artikel sampt unde eyn jowelk bisunderliken unde geven ius patronatus den vorgescreven Hinrecke, Henninge unde Bernde unde na orem dode dem borgermesters unde rade der vorgescreven stad Hildesem, by one to blivende to ewigen tyden, ok Johannem Hennen to synde de erste besitter der vorgescreven viccarie, darna ern Tidericum Azel unde denne vort ern Brunoldum Azel so vorgescreven is, vulbordem unde besteden wy vor us unde unse nakomen in dem namen der hilgen drevoldicheyt. Unde to merer orkunde unde bekantnisse hebben wy vor us unde use nakomen use ingesegel gehangen laten an dussen breff, gegeven to Sturwolde na der bort Ihesu Christi unses leven heren Dusent verhundert jar darna in deme viffundeachtigesten jare, ame dage sunte Gallen des hilligen confessoris.