Magnus dei et apostolice sedis gratia episcopus Hildesemensis honorabilibus viris capitulo et canonicis capelle beate Marie Magdalene site in aula nostra episcopali Hildesemensi sinceram in domino caritatem. Pridem siquidem capellam sancti Severi sitam in curia quondam Oddonis in civitate Hildensem, cuius quidem capelle collatio, provisio, presentatio seu quevis alia dispositio per obitum certorum de Salder ad nos dinoscebatur devoluta, dicte collegiate capelle beate Marie Magdalene in et ad augmentationem fructuum prebendarum eiusdem capelle ex certis causis animam nostram ad hoc moventibus, venerabilis capituli nostre ecclesie Hildesemensis pleno accedente consensu, cum omnibus iuribus et pertinentiis suis auctoritate ordinaria assignavimus, anneximus, incorporavimus et perpetuo univimus, iure episcopali quoad procurationes solvendas semper salvo, quodque vos capitulum et canonici onera ipsi capelle sancti Severi incumbentia supportare debeatis consueta, prout in certis patentibus literis nostro et dicti capituli sigillis munitis plenius continetur. Cuius etiam unionis pretextu possessionem dicte capelle sancti Severi ac iurium et pertinentiarum predictorum dudum fuistis assecuti, et sicud nuper pro parte vestra oblata petitio continebat super dicta incorporatione et eius iuribus ab aliquibus forsitan hesitari et vos molestari posse pertimescitis in futurum. Ne igitur propterea huiusmodi nostre gratie effectu vos frustrari et de nostre incorporatione firmitate dubitari contingat, pro ipsius firmiori subsistentia et maiori firmitate eandem incorporationem sive unionem sicut premittitur de dicta capella sancti Severi in augmentationem fructuum dictarum prebendarum per nos factam auctoritate nostra ordinaria approbavimus et confirmavimus et quatenus necesse sit eandem capellam sancti Severi sive per obitum quondam Johannis Conolvi ultimi possessoris in partibus defuncti, sive adhuc per eius aut alterius cuiuscunque liberam etiam coram notario et testibus sponte factam resignationem, quam si admissa non fuerit, recipimus et admittimus, dimissionem vel cessionem aut alias quovismodo vacantem cum omnibus iuribus et pertinentiis suis supradictis prebendis et eorum fructibus antedictis de novo unimus et incorporamus, decernentes eadem auctoritate eandem capellam sancti Severi apud dictam capellam beate Marie Magdalene perpetuis temporibus permansuram, supplentes quoque omnes et singulos defectus, si qui intervenerint in premissis. In quorum omnium et singulorum fidem et testimonium premissorum sigillum nostrum presentibus est appensum. Datum anno domini Milesimo quadringentesimo tricesimosexto, feria secunda post festum beati Viti martiris.