Charter: Urkunden Kollegiatstift Schüsselkorb A VII 5-2
Signature: A VII 5-2
Add bookmark
Edit charter (old editor)
1428 Juni 15
Bischof Magnus von Hildesheim überträgt nach Aussterben der entsprechenden Zweige der Familie von Saldern mit Bewilligung des Domkapitels die Ausstattung der Kapelle St. Severi in der Altstadt zur Besserung der Pfründen an die Maria-Magdalenenkapelle im Schüsselkorb. Die Kanoniker sollen die Gottesdienste in der Severikapelle fortführen, die Gebäude instand halten und jährlich zu Weihnachten vier rheinische Gulden Prokuratiengelder zahlen. Dompropst Eckhard, Schulmeister Heinrich und das Kapitel erklären ihre Zustimmung. Material: Pergament
Dimensions: 26,4 x 19,2
Wy Magnus van godes gnaden bisschop to Hildensem bekennen openbare myd dussem breve, alse de lenware der cappellen sunte Severi beleghen in unser stad to Hildensem in hern Odden hove van dodes wegene hern Hanses unde hern Cordes, ridderen, Boden unde Syverdes, alle geheten van Saldere, uns unde unsem stichte vorledeghet unde angevallen is, also hebbe wy angeseen, dat de ghebuwete unde tobehoringe der sulven capellen degher vorghan unde noch in tokomenden tyden vorder vorvallen unde vornichtet mochten werden. Hirumme hebbe wy myd willen unde vulborde unses capittels to Hildensem gelecht unde legghen in crafft dusses breves de vorbenomden capellen sunte Severi myd al oren renten, tobehoringen unde rechticheyden na utwisinge der breve, de dar up unde over gegheven sind, to beteringe der provende unde capellen sunte Marien Magdalenen beleghen in unsem hove to Hildensem, darby to blivende to ewighen tyden. Hirvor schullet de canonike der capellen sunte Marien Magdalenen vorwaren unde holden laten alle de missen, de dar up gesad sind to holdende in der capellen sunte Severi, unde darto de capellen in beteringe holden unde nicht vorvallen laten. Ok schullet de canonike sunte Marien Magdalenen vorbenomt uns unde unsen nakomelingen eder deme capittele to deme dome to Hildensem, wanne neyn bisschop enwere, alle jar uppe Wynachten ver Rinsche guldene geven to procuratien van der vorbenomden capellen weghen sunte Marien Magdalenen. Dat dusse dingk alle alse vorgescreven is to ewighen tyden stede unde vast geholden werden, so hebbe wy dessen breff gevestend unde bestedeghet dat also myd unsem angehangeden ingesegele. Unde wy Egherd domprovest, Hinrik scolmester unde dat gantze capittele to Hildensem bekennen in dussem sulven breve, dat alle vorgescrevenen stucke myd unser witschup, willen unde vulborde geschein sin. Des to bekantnisse hebbe wy unses capittels ingesegel an dussen breff gehenget laten, de gegheven is na godes bord Verteynhundert jar darna in deme achtundetwintigesten jare, in sunte Vitus daghe des hilghen mertelers.
Language:
A click on the button »Show annotation« displays all annotations on the selected charter image. Afterwards you are able to click on single annotations to display their metadata. A click on »Open Image Editor« opens the paleographical editor of the Image Tool.
){kind=link}
){kind=link}