Wy Johan senior unde canonike sunte Marien Magdalenen capellen uppe deme domhove to Hildesem belegen bekennen opembar in dusseme breve vor uns unde unse nakomelinge unde alsweme, dat wy godde unde syner leven moder Marien unde allem hymmelschen here to love unde to eren, allen cristene zelen to hulpe unde to troste umme bede unde innyger andacht willen des ersamen Borcherdes van Huddessem unde Katerinen syner eliken husfruwen uns unde unse nakomelinge hebben vorplichtiget unde vorplichtigen jegenwordigen in macht dusses breves to veer memorien allejarlikes to holdende to ewigen tyden, alse des dinxedagen avendes vor allen quatertemperen unde des mitweken morgens in allen quatertemperen vigilie unde zelemissen willen lesen vor de leven zelen, dar se des vor begherende syn, unde vor alle cristen zelen, myt viff collecten, unde truweliken dencken in den missen unde sunderliken ok in canone der erbenompten Borchardes unde Katerinen unde alle, dede ute oren slechten vorstorven syn unde vor alle dejenne, dar se des vor begerende syn, in wise unde mate, alse men borliken dencken unde bydden schal vor de levendigen unde doden in canone. Unde uppe dat sodanne memorien deste andechtiger unde flitiger geholden werden ewichliken, hebben se uns dar to gegeven vor eyne almissen tweundedrittich lutke punt Hildensemscher weringe, de van one entfangen hebben unde de vort beleggen willen unde schullen uppe jarlike rente, darvan to gevende eyneme jowelkem canonike eynen schilling lutker penninge, so nu to Hildesem ginge unde geve syn, to jowelker tyd, alse men de memorien holdende wert. Des to bekantnisse hebben wy oene dussen unsen breff myt unseme ingesegele vorsegeld gegeven, na der gebort Ihesu Cristi unses heren Dusent verhundert in deme dreundeachtigesten jare, amme hilligen avende sancti Nicolai episcopi et confessoris.