Wy Conradus s[e]nior unde canonicke in sunte Mar[ie]n Magdalenen cappellen uppe deme domhoffe bynnen [H]ildensem bekennen openbare in d[u]ssem breve vor uns, unse nakomen unde alsweme, da[t] wy by uns unde in unser vorwaringe ghenomen hebben eyne vorsegelde funda[c]ien unde eynen vorsegelden breff van deme ersamen rade der stadt to Brunswick vorsegelt uppe tweyhundert gude Rinsche gulden sprekende myt anderen breven, dede ove[r] dat lehenn in deme gherhuse in sunte Ciriakes kerken uppe deme Ezelstige vor Hild[e]nsem van den testamentarien hern Hinrick Witkopes zeliger dechtnisse, wandages unses medecanonickes, uthe synen nagelaten goderen na zynem willenn gestichtet unde fundert, umme sunderlikerer bede willen ergenanten ern Hinrickes testamentarien. Ok so unde alse wy in der sulven fundatien mede benompt zyn, so willen wy unde schullen sodanne fundatien unde breve truweliken by unsen egen breven vorwaren, deme lehne unde bisittere des lehns in tokomenden tyden tho gude, unde icht de erscrevene radt der stadt to Brunswick sodanne hovetsummen wolde affkopenn, schullenn wy unde willen sodanne summen truweliken wedder helpen beleggen unde denne de breve darover gemaket by de fundatien leggen, dat sodanne summe, daruppe dat lehen gefundert is, by dem sulven lehne to ewigen tyden blyve unde nicht deme besittere ton handen kome. Dusses to urkundt unde mererer tuchnisse der warheyt hebben wy unse secret ann dussen breff witliken lathen hangen, na goddes gebordt unsers heren Dusent viffhundert unde twintich jare, ame mandage na Jubilate.