In nomine domini amen. Sifridus dei gratia Hildessemensis ecclesie episcopus omnibus imperpetuum. Cum omnes pauperes elemosinis respiciendi sint secundum preceptum dominicum, amplius tamen pauperes illi respiciendi sunt, quos dominus ad terrorem et nostram correctionem morbo lepre percussit, reddendo illos omnibus contemptibiles et despectos. Ad perpetuam igitur memoriam notum esse volumus tam presentibus quam futuris, quod de consensu et beneplacito nostri capituli pro remedio anime nostre et salute contulimus pauperibus leprosis extra muros Hildessemenses proprietatem duorum mansorum in Eddessem, recepta resignatione a domino Ernesto pincerna nostro, qui predictos mansos a nobis et a nostra tenuerat ecclesia in feodo, perpetuo possidendam. Fructus autem et proventus mansorum dictorum prefati pauperes divident cum sacerdote sancte Katerine, qui pro tempore fuerit, annis singulis equa sorte. Ut autem hec nostra collatio liberaliter facta et dicti militis resignatio perpetuis temporibus firma permaneat et inviolabiliter observetur, presentem literam sigillo nostro et nostri capituli ad maiorem cautelam et certitudinem fecimus communiri. Testes sunt Wolradus Montis prepositus, Arnoldus de Wereberge, Wernerus plebanus, Bernardus de Dorstad, prepositus Cono, Bernardus de Meynersem, canonici Hildensemenses, Ecbertus camerarius, Conradus marchalcus, Aswinus et Conradus fratres de Stenberge, Ludolfus de Cramme, Sifridus de Rutenberge, milites, Albertus et Conradus fratres de Dampmone, Johannes de Franckeneberge, Theodericus de Minda, Theod[ericus] Friso, Heyno Westfal, Wolthmarus de Domo, Conradus et Borchardus fratres de Valva orientali, Bernardus Advocatus, Conradus Eggelheydis, qui preest infirmis, burgenses Hildensemenses, et alii complures. Actum et datum Hildessem anno domini Millesimo CC° LXXX° primo, tercio nonas Septenbris.