We de rad der stad to Hildensem bekennet unde betuget openbare, dat vor uns quemen Hans Vustman, Hinrick Hovel, olderlude unde vorstendere der kerken sunte Katherinen unde der armen zeken lude darsulves, unde frouwe Czyeke, wedewe Hermen Ernstes. Desulve frouwe Czyeke bekande umme twene andere unser stad breve, der eyn inneholde an Cord Steyns huße unde wonninge uppe deme Eßelstige belegen seventich gulden hovetgeldes umme driddehalff punt unde achte schillinge penninge jarlikes tinßes Greteken wedewe Olrick Middesborges unde oren erven, de ore alße van ervetales wegen angestorven unde geworden sin, de andere breff inneholde an Hans Beckers huße unde wonninge uppe der Jacobstraten vefftich gulden hovetgeldes umme dre gulden tinßes Hermen Ernstes unde sinen erven. De vorschreven twene breve unde gelt, tinß unde hovetgelt mit alle oren tobehoringen hebbe se gode, siner leven moder Marien unde alle godes hilgen to love unde to eren unde allen cristenen zelen to troste gegeven der vorschreven kerken sunte Katherinen unde dersulven kerken to truwer hant oren olderluden, id darmede to schigkende unde to holdende, alße hirna beschreven iss, unde dede dersulven breve, tinßes unde hovetgeldes mit alle oren tobehoringen darup vor sek unde ore erven in unser jegenwardicheit eyne gantze rechte vorticht, so dat de vorbenomden olderlude darmede mogen manen unde sodanne tinß schigken unde keren in nabeschrevener wiße. Des so bekenden de vorbenomden olderlude, dat se sek unde ore nakomen vor de vorschreven twene breve unde vor sodanne vertich punt hovetgeldes umme twey punt tinßes, de frouwe Czeseke wedewe Bertold Friwarkes den vorbenomden olderluden hebbe gegeven an orem huße unde woninge an deme Osterdore belegen, hebben vorwillet unde vorplichtiget, dat se unde ore nakomen nu unde to ewigen tyden alle weken willen bestellen in der vorschreven kerken sunte Katherinen dre misse vor deme nedderen altare vor deme kore belegen, dar se willen to holden eynen fromen prester, deme se sodanne dre misse bevelen alle wecken to holdende, alße eyne misse van der hilgen Drevoldicheit, de anderen van Unser Leven Frouwen unde de dridden van allen cristenen zelen, unde in allen missen schal desulver prester dechtnisse don der vorbenomden Ernstingeschen, der Friwarkschen unde orer beider husheren unde alle derjenner, dede uthe oren slechten sin vorstorven. Unde deme prestere, de sodanne dre misse vorwaret alße vorschreven iß, willen se allejarlikes van deme vorschreven tinße geven seß punt sevedehalven schilling unde twene penninge unser nyen penninge, unde der de helffte uppe Paschen unde de anderen helffte uppe sunte Michaeles dach, unde wen desulve prester sodanne misse nicht lengk vorwaren wolde edder van dodes wegen vorvelle, vor wene denne de Ernstingesche unde Frigwarksche vorbenant bede, deme wolden de obgenante olderlude sodanne vorschreven dre misse bevelen sunder insage. Unde so vakene sodanne vorschreven hovetgelt affgegeven worde, willen de olderlude vorbenomd dat to stund wedder beleggen, so dat de tinß, de darvan jarlikes vallen unde werden mach, darto moge denen alße vorschreven iss. Ok scholde eyn jowelk der vorbenompden olderlude, ore nakomen unde ore hovemester allejarlikes vor ore arbeit van deme vorschreven tinße hebben malk eynen nyen schilling penninge, so de benomden olderlude vor uns bekantnisse deden unde dyt vor sek unde ore nakomen aldus willekoreden, aver uns, unser stad schot unde dingplicht alle jar darvan to gevende ungemynret. To bekantnisse dusser stugke hebbe wy unser stad ingeßegel an dussen breff hengt, na goddes gebort Veerteinhundert jar darna in deme veereundesestigesten jare, am avende Alle godes hilgen. lb lb Ernst Vogedes, lb Albert Bode.