Wy mester, olderlude unde gemeynen warken der knokenhauwere des groten markedes to Hildensem bekennet openbare in dussem breve vor uns unde unse nakomelinge, so alse de ersamen heren deken unde dat gantze capittel to sunte Andreas bynnen Hildensem sek tigen uns vorplichtet hebben in orem breve, dat se Corde van Bokelem, Metteken sine eliken husfruwen, der na wan se van dodes wegen vorfallen sint, Alheyde, de sin elike husfruwe gewest ys, orer elderen unde kinder sele unde alle dejenne, de ute den slechten vorstorven sint, unde alle kristen zele allejarlikes willen beghan in orer kerken des mydweken avendes neyst na deme sondage Invocavit myt vigilien unde des donnersdages morgen myt zelemissen, dar de kindermester myt den scholeren schal jegenwardich wesen, alse desulve ore breff dat inneholdende ys. Des so vorplichte wy uns unde unse nakomelinge den benomden deken unde capittele unde oren nakomelingen, so dat wy one allejarlikes uppe den sulven donnersdach, alse de begengnisse gescheyn is, willen geven eynen verding Hildensemscher weringe unde deme prester, de de mysse singende wart, darvor he der sele na inneholde dessulven breves in der mysse vor deme offertorio muntlike dechtnisse don schal, dre nye penninge to votyven unde deme scholemester achte nye penninge, unde darto wille wy kopen vor veer nye schillinge semmelen unde geven eyneme jowelken scholere eyne, arvemen aver der scholere to der myssen nicht sovele, dat me de semelen alle vordeylde, wes denne dar over bleve, wolde wy geven armen luden na inneholde der fundacien. Vorder so vorplichte wy uns in krafft dusses breves, alse weret, dat der vorscrevenen canonicke, viccarieße, capellane, officianten eder terminarieße to sunte Andreas vorbenomd der eyn jowelk uppe de vorscrevene tyde alse des mydweken avendes eyne vigilie unde des donnersdages morgen eyne zelemisse bisunderen lesen, biddende vor de vorscrevenen sele, eder in oren myssen dechtnisse deden dersulven, dat wy dem des morgens, wan he de mysse gelesen hefft, willen geven ver nye penninge to votiven. Ok so wille wy den vorbenomden Corde van Bokelem, Metteken sine husfruwen unde Alheyde, ore elderen unde kindere scryven laten in dat dodenbouk, so dat me orer unde alle derjennen, dede ute den slechten vorstorven sint, ewichlike dechtnisse don schal des sondages uppe deme predigestole myt allen kristen zelen, unde darvor wille wy deme deken geven, alse dat wontlik ys. Dyt love wy mester, olderlude unde gemeynen warken der knokenhauwer vorbenomd vor uns unde unse nakomelinge den erbenomden deken unde capittele to sunte Andreas unde oren nakomelingen in guden truwen stede unde vast to ewigen tiden to holdende, unde hebbet des to bekantnisse unses amptes ingesegel an dussen breff hengt, na goddes bord Verteynhundert jar darna in deme vyveundevefftigesten jare, in sunte Gregorius dage.