Wii Magnus van godes gnaden bisscop to Hildensem bekennet openbare in dussem breve vor uns, unse nacomen unde alsweme, dat wy unsen leven getruwen unses amptes der knokenhouwere uppe deme luttiken markede to Hildensem vulborden unde erloven unde bestedigen on, ok in unde mit crafft dusses breves all ore olde recht unde wonheit, de se wente herto gehad hebben unde dar wy se by gevunden hebben unde dar se mede van unsen vorfaren begavet, begnadet unde privilegieret sint, unde unsen leven getruwen deme rade to Hildensem enbekenne wy neynerleye rechticheyt an unsem vorbenomden ampte der knokenhouwere des luttiken markedes bynnen Hildensem, sunder uns unde den knokenhouweren des luttiken markedes unde oren nacomen van unser wegene alleyne. Ok bestedige wy on unde vulborden, dat alle unde eyn ytlik knokenhouwere uppe deme vorscrevenen luttiken markede to Hildensem, de van deme genanten ampte mit gerichte unde rechte vorlecht sint van der werken eder eyns werken wegene, mit on to neyner delynge noch lote gan eder der bruken schullen eder schall, yd ensy mit oren guden willen, unde wanne de sakewolde dat esschet van mesteren unde olderluden, so schullet se eme dat loth uitlecgen. Vortmer alse eyn wonheyt to Hildensem hefft gewesen, dat de knokenhouwere darsulves unse ampte neyne botlinge snyden moten unde de zellen unde vorkopen uppe oren scharnen van sunte Andree dage an wente to Paschen, so hebbe wy umme des gemeynen besten willen unsem ampten den knokenhouweren uppe deme luttiken markede to Hildensem unde oren nacomen gevulbordet unde erlovet, dat se van sunte Andree dage an wente to der Vastene boetlinge snyden mogen unde neyne schaep in oren husen unde de zellen unde vorkopen uppe oren scharnen des vorscrevenen luttiken markedes to Hildensem. Dusses to orkunde hebbe wy unse ingesegel gehenget heten an dussen breff, geven na godes bord Verteynhundert jar darna in deme verundevertigesten jare, in sunte Pauli dage Conversionis.