Wy mester, olderlude unnd gantze gemeinen wercken des knokenhauwerampts bynnen Hildensem by sunte Andreas kerckhove up den lutken scharne bekennen unnd betugen opentlig in dussem breiffe vor uns, unse nakomen unnd allermennichlig, datt wy van den ersamen und dogethsamen Hennigk Becker, Hinrick Bodenn, Hennigk Oldekoppe und zeligern Hans Hollandes nagelaten wethwenn alse testamentarien Metelen, zeligern Wernicke Wernickens nagelaten wethwenn, ethwan borgerschen tho Hildensem, eynen breiff ahn Reyncken Hessen huse up der Nigenstrate, darahnne uns tweyhunndertt nige punth geldes inholtt und vormoge eynes ersamen raides willebreiffs overgegevenn und gentzlich vorlaten, empfangenn hebben, darvor wy unß vor uns unnd unse nakomen tho ewigenn tydenn in de drey sekenhuse vor Hildensem tho sunte Caterinenn, tho sunte Nicolaus up dem Damme unnd thom Hilligenn Crutze vor der Nigenstadt belegenn, inn eyn jeder sekenhuß alle wekenn vor eynen mattier witbroth den armen provenernn under sick tho delende umbe goddes willenn tho gevende vorplichtigett unnd vorplichtigenn jegenwardigen in crafft dusses breiffs, welckere witbroth schullenn de benompten armen lude tho iderer wekenn des frydages uth eynes beckers huse, den wy ohne alle jar eyns nohmen willen, halenn laten. Unnd schal denn armen ludenn alletydt ernstlich bevohelenn werdenn, godt denn almechtigen vor syne grundelosenn barmheticheidt unnd erlosinge dem mynssligen geslechte bewisett, myt flite tho danckende, und darby flitich tho biddenn umbe tydtligenn frede, alle noithtorfft unnd datt synn almechticheidt uns unnd alle mynsschenn vor allem bosenn tydtlig unnd ewiglich gnediglich wille bewarenn, alles getrulich ahne geferde. Des inn orkunde der warheidtt hebbenn wy unsers ampts ingesegel witlig ahnn dussenn breiff dohnn hangenn, nach Christi unnsers levenn hern unnd salichmakers gebortt Dußenth viffhundertt unnd im viffunndvertigestenn jarenn, fridages na Exaudi.