Wy mester, olderlude unde gemeyne wercken der knokenhauwer up den lutken scharne by sunte Andreas kerckhoiffe bynnen Hildensem bekennen und betugen opentlich in und mitt dussem breiffe vor uns, unse nakomen unnd alschweme, datt wy van den ersamen Lüder van Barvelten, Hanse Stoppesacke, Henninge Oldekoppe, Henningk Werneken und der Hollendesschen alse testamentarien zaligen Werneken Wernekens und Metelen syner eheliken husfruwen vertich lutke puntt Hildensemsscher weringe upgebortt und entfangen hebben dussergestalt, datt jarlichs van den hern und canonicken der kercken sancti Andree darsulvest tho Hildensem schall up den dinxstag vor Martini tho ewigen tiden eyn memoria geholden werden, dartho wy allejarlichs densulvenn canonicken twolff schillinge luttich und dem preister, de vor de zehele biddett und de memorien vorkundigett, eynen schillingk ministreren und geven schullen und willen. Des schullen mester und olderlude unses ampts thor tidtt tho dersulven memorien und zehelemissen tho opper gaen, und darvor eynem idern, de dar thor stede erschinett, eyn Mariengrossche tho presentien gegeven werden. Whe aber van den uthebleve unnd nichtt enschickede des Mariengrossche, scholde by dem ampte unuthgegeven bliven. Begevett sick ock nafolgende in thokomenden tyden, datt de vigilie und zehelemissen gelick itzt in umbeliggenden stedenn dalgelechtt, alsedenne willen und schullen wy effte unse nakomen jarlichs vor dritteyn schillinge wythbroeth tho twen tyden, alse des fridags vor und na Martini, up dem kerckhoiffe Andree, wan datt wittebroeth so Hans Piningk zeliger gemakett, umbe gots willen tho gevende und armen luden medethodeilende schuldich und plichtig syn trulich und ungeferlich. Des in orkunde der warheitt hebben wy unses ampts ingesegel witlich hirunden an dussen breiff dhon hangen, gescheen und gegeven nach Christi unses hern gebortt im Veffteinhundersten und sesunddrittigsten jarenn, am dage Galli abbatis.