Wy de radt der Nygennstadt vor Hildensem bekennenn openbar in dussem breve vor uns unnd unse nakomen, dat wy vann unser stadt wegen uppgebort unnde to vuller noige entfanngen hebbenn vann deme commissario unnser commissyen sancti Salvatoris unnde sinenn nakomen anderhalff hundert pundt lutkes geldes. Hyrvor hebbe wy vor unnß unnde unße nakomen vorkofft deme erbenomden commissaryo unnd sinenn nakomen uth unser stadt kemerye, renthen unnde redestenn uppkomen seß pundt lutkes geldes tinses jariger gulde, den vorscreven tinß ohnne alle jar beredelikenn to gevennde, halff upp Paschen unnde halff upp sunte Michalis dach, ane hinder unnde vortoch. Aver wy hebbenn uns unnde unßenn nakomenn sodanne gnade, macht unnd wilkor beholdenn, dat wy dussen vorbenomden tinß alle jar mogenn wedder affkopenn van deme commissaryo der commissyenn sancti Salvatoris unnde sinenn nakomen, sunder de loße scullenn se ohnne eyn fernndell jars tovornn vorkundigenn. Wenner deme so gescheynn ist, denne darnha to deme nogestkomennde Paschenn effte sunte Michaelis dage, alsedenne sint wy edder unnße nakomenn anderhalffhundert pundt lutkes geldes myt bedagedem unnd vorsetenn tinße vorplichtet inn eynem hope wedder to gevende unnd woll to dancke to betalennde deme commissario unnßer commissyen sancti Salvatoris upp unnßer stadt unnde sinen nakomenn. Deß to bekanntnisse hebbe wy erbenomde radt unnser stadt ingesegell ahnn dussenn breff hengenn hengen, na goddeß bort Veffteinhundert darnha inn deme twolfftenn jar, am sonnavend na Omnium Sanctorum. lb Tile Roth lb B. Tile Rincopp