Wy de radt der stad to Hildensem bekennet openbare vor uns, unße nakomen und alsweme, dath wy van Corde Puestman hunderth pund unser nigen pennige, in unser stad nuth wythlighen tho kerende, upghenomen und entfanghen, thobehorich deme commissario deß lehnes vor sunte Martens altare in der kercken sancti Lambartii up der Nygenstad vor Hyldensem, wuevore wy deme sulftighen commissario, sinen nakomen edder deme holder dusses breves myth orem guden willen hebben vorkoft und vorkopen in macht dusses brevess vyff pund dersulven nigen pennige edder sodans gheldes, alße wy to schote entfanghen, jarliges tinses, de wy ome alle jare uth unser stad upkomen plichtich sin to ghevende, de helfte uppe sunte Johannis daghe to Myddensommer und de andern helfte uppe Winachten. Doch hebben wy uns de macht beholden, dat wy alle jare dussen vorgetekenden tins wedder affkopen moghen, und so wy deß gheneget, willen wy benompten commissario edder sinen medeghesechten deß de loße tovorn twischen sunte Mychhaelis daghe unnd sunte Martens vorkundighen, und welkes jaers sodans geschein, denne darna to deme erstkomende Winachten willen wy deme vorgemelten commissario edder sinen medebenompten sodan vorgetekenden hunderth pund unser nygen pennige edder sodans gheldes alße vorgeschreven ys myth allen bedagheden vorseten tinsen, ift der ichteß vore entbroken und enttzehen were, to ghevende sunder weddersprake. Des to forderm orkunde hebbe wy unser stad ingezegell ghehenget an dussen breff na goddes borth Dusenth vyffhunderth an deme dreundtwintyghesten jar, des daghes sancti Sylvestri pape.