We de rad up der Nyenstat vor Hildensem bekennet unde betughet openbare in dessem breve, dat vor us quam Tileke Cras unde bekande vor sek unde vor syne erven, dat he an syme hus unde an alle de gansen woninge unde tobehoringhe, de dar to hort, dat up der Bedelerstrate beleghen is up dem orde der Herenstrate vor Tileken hus Munsels vor driddehalve lodige mark sulvers Hildensemescher weringhe hebbe vorkoft eynen lodigen verding tinses jarliker gulde Hermenne van Helmersen unde synen erven, den benomden tyns allejarlikes beredelken to ghevende half to sunte Mychelis daghe unde half to Paschen ane vortoch eder hinder. Aver Tileke Kras heft sek allene desse macht unde gnade beholden, dat he unde syne erven ifte de besitter huses unde blekes vorbenomd dessen benomden jarighen tins eynes jowelken jares moghen wederkopen van Hermenne Helmersen eder van synen erven, men de lose schullet se on kundighen eyn verdendel jares vor der betalinghe, unde wan dat schude, denne darna to deme negesten tokomenden Paschen eder sunte Mychelis daghe so synt Tileke Kras unde syne erven ifte de besitter huses unde blekes vorbenomd driddehalve lodige mark Hildensemscher weringhe plichtich weder to ghevende unde to betalende Hermenne Helmersen unde synen erven. Ok sint se on plichtich to ghevende to dersulven tid den vorschulden tins unde darmede icht on vore to jengher tid ichtes van tynse vorseten were. To bekantnisse desser vorscreven stucke so hebbe we de rad vorbenomd dessen bref besegelt myt user stat inghesegele, na godes bort Verteynhundert jar darna in deme negheden jare, des dinsedaghes negest na deme sondaghe, alse me synghet Cantate, dat is de dinsedaghes na user kerkemisse.