We radman uppe der Nygenstat buten der muren to Hildensem bekennen openbare unde betughet in desseme breve, dat Tyleke Karenvorere unde sine erven Grethen Hardmannes maghet Rolwinghes unde oren erven eder we dessen bref heft vor twe marc lodighes sulveres Hildensemer wichte unde witte hebbet ghesath unde in ore were gheantwordet ore hus mit der gantzen woninghe de darto hort, dat beleggen is uppe user Nygenstat in der Goslerschen strate, alsusdanewis, dat de sulve Grete de macht heft, dat se allejarlikes twischen Winachten unde Lechtmissen van Tyleken Karenvorere unde van sinen erven mach ore gheld weder eschen, unde wanne se dat dede, so scal de sulve Tyleke eder sine erven dat vorbenomde hus unde woninghe van Greten vorbenomd unde van oren erven eder van deme, de dessen bref hedde, to deme Paschen, dat na der eschinghe neist tokomende were, weder afledighen unde losen vor twe lodighe marc sulveres wichte unde witte alse hirvore screven is. Hedde se ok an deme sulven hus unde woninghe wat vorbuwet, dat scolden se ore ok wedergheven mit den twen marken to der sulven tid. Weret, dat se des nicht endeden, so mach de sulve Grete unde ore erven eder we dessen bref hedde de vorbenomden twe marc unde wat se an deme hus unde woninghe vorbuwet hedde soken an deme sulven hus mit kope eder mit sate, wo id on bequemest were, ane Tyleken Karenvoreres unde siner erven hinder unde wedersprake. To ener betughinghe alle desser dingh so hebbe we radman vorbenomd dessen bref ghevestent mit user stad ingheseghele, na goddes bort Dritteynhundert jar in deme vifundeveftighesten jare, in sunte Thomas avende des hilghen apostelen.