We de rad uppe der Nygenstad vor Hildensem bekennet unde betughet openbare in dussem breve, dat vor uns quam Luder Grafhoff unde bekande vor sek unde vor syne erven ofte vor dem besitter synes huses alsodanewys, dat he wille unde schulle lyden Hinrik Weddegen unde syne erven ifte dem besitter synes huses, dat se water halen to dem borne in syme hofe dach unde nacht, wen one des behof ys, unde se schullen hebben eyne porten dorch den thun, aver se schullen de porten bewaren, dat Ludere ifte dem besitter synes huses nenen schaden daraf nemen. Ok so schullen se den borne to beydent siden in beteringhe holden, wen ome des behof ys. To bekantnisse dusser vorscreven stucke so hebbe we de rad vorbenomd dussen dussen bref beseghelt myt unser stad inghesegele, na godes bort Verteynhundert jar darna in dem dryttighesten jare, in des hilghen Cruces daghe, de in dem herffeste kumpt.