Ek Olrick Tziveken unde Leneke sin husfruwe bekennen openbar yn dussem breve umme eynen des ersamen rades to Hildensem besegelden breve, inholdende an Tilen Ansorgen huse unde wonige uppe den Eselstige umme drittich Rinsche gulden hovetgudes umme twene Rinsche guldene tins, vor den gulden jo sestein nie schillinge, unde dree andere des vorsichtigen rades der Nigenstat Hildensem vorsegelden breve, der ein inholt an Hans Gropen huse unde wonige umme elven lodige mark hovetgudes umme dree Rinsche gulden tins, de ander inholt an Hans Honrodes hus unde wonige umme drittich Rinsche gulden hovetgudes umme twene Rinsche guldene, vor jo den gulden verundetwintich schillinge tins, de dridde inholt an Hans Machtersems hus unde wonige umme drittich Rinsche gulden hovetgudes umme twene Rinsche gulden tins, alle mek unde mynen erven sodane breve alle vorgescreven, geve we unde laten de mit alle oren rechtecheyden, eyden unde tobehoringen, hovetgud unde tins in unde mit dussem breve deme vorsichtighen rade uppe der vorbenomden Nigenstad, oren nacomen unde don der eyne ganse rechte vorticht vor uns unde unse erven to des vorbenomden rades, orer nacomen hant, so dat se darmede moget manen, handelen, don unde laten, likerwys so wy, unse erven erven darmede mochten gedan hebben. To bekantnisse dusser stucke hebbe ek Olrick Tziveken vorbenomd vor mek, myne erven, myne husfruwen, oren erven myn ingesegel witliken an dussen breff gehenget, na godes borth Verteinhundert jar am achteundevefftegesten jare, ame dage sancti Clementis.