Wy de radt der Nigenstadt vor Hildensem bekennen openbar in dussem breve, dath vor uns quam Hans Borchardes zeliger nagelaten husfruwe, bekande, dath ße sick mith Bernde Krumrade orhem itzigen eemanne in den standt des hilligen echten levendes begeven unnde demsulven Bernde in der eeberedunge orhe hus, hoff sampt de gantzen wonunge unde thobehoringe, alße dartho horet, up der Goslerschen strathe twischen Hans Hardenacken unde Hanse Korengel des eldern huseren unnde wonungen belegen, ßo orhe van Hanse Borchardes zeliger angestorven, vor uns dem rade erfflick uptogenn, thogesecht hebbe, demnach ße uns gebeden, wy gedachten Bernde Krumrade, orhe erven, vor eynnen rechten erven in des Hans Borchardes zeliger stede tho vorbenantem huse unde hove ßetten unnde ordineren wollen, des wy nicht weigeren kunnen, demnach ßo ordineren unnde setten wy genompten Bernde Krumrade unde syne erven tho vorbenomptem huse, hoffe vor rechte erven, szo dath ße darmede mogen don unde lathen gelykerwiß zeliger Hans Borchardes unnde syne erve hirbevorn hebben don mogen anhe jemandes insage. Des tho bekantenisse hebben wy obgenante radt unßer stadt ingesegel ahn dussen breff laten hengen, nach Christi unses leven hern gebordt Veffteinhunderth unde sestich jar, dinsdages nach Margarete virginis. lb Michel Smedt, lb Hinrick Dunthe.