Wi de rath der Nienstadt vor Hildesheim bekennen hirmit openbar, dat vor uns ist erschenen Ilsebee, seligen Lorentz Kolers nagelaten husfruwe, brachte uns vor Everde Dickhagen, Barwertt Nortmeiger, Hanse Krekemeiger und Cordt Koler mit bitt, wi desulvigen ohrem unmundigen kinde Lucien tho vormunden mochten bestedigen, dem also von uns beschehen und geborlicherwise sin bestedigett worden, und bekande wider, dewile se sich mit Engelcken Schnellen wedderumb in den ehestandt begeven, dat se tho ener affsonderinge gedachtem ohrem kinde Lucien vertig gulden munthe bescheden hebbe, so im uthgange twolff jar gedachter Engelcke Schnellen, wo se de moder mit dode vorfelle, schal uthgeven und den vormunden thostellen edder aver, dar se de ferner wolden uthdoen, sick mit ohne darumb tho vorgeliken. Und sodane twolff jar over, dewile de gulden unuthgeven sin, schal und wil Engelcke Schnellen und de moder dat kindt bi sich beholden und mitt ethen, drincken, cleder und umliger nottorfft versehen und versorgen und in hege und plege holden. Dusses tho bekantenisse hebben wi unser stadt ingesegel an dussen breff doen hangen, geschein im jare nach Christi gebortt Eindusent viffhundertt negenundsestig, den 12. Aprilis. lb lb Beneditz Steuer, lb Henning Hardes.