Ek Otte Bock ridder, anders geheten Ordenberch, bekenne openbare in dessem breve vor alle den, de one sen edder horen lesen, dat ek mid gudem willen unde vorbedachtem mode gode to eren unde Unser Leven Vrowen unde dem hilgen hern sente Panthaleone unde dorch salichett myner eldern sele unde myner hebbe geven twelff lodige mark to dem lene unde to der cappellen, dar sente Panthaleon eyn hovether is, belegen in der stat to Hildesem up sente Panthaleonis dore, unde hort to dem hove, den to desser tid heft her Diderik van Rottingen, domhere to Hildesem. Dit vorgenante gelt hebbek an eyner huve landes unde twen hoven mid orer tobehoringe belegen in dem dorpe unde up den velden to Reden by Gronowe, unde is geheten de Vischove, unde an eyner vischerie belegen up der Leyne, de dar to hort, alse utwised de breff, den de erbare in god vader unde here, myn gnedige here bischop Johan to Hildesem my darup gegeven heft, unde hebbe densulven breff gelecht by de geistlike lude prior unde covent der Carthusere orden sente Marien closter vor Hildesem in desser wis: Wanne ek affgegan bin van dodes wegen - dat god lange vriste - , so schullet se den breff up de huve unde up de vischerie richen dem, de dat len unde cappellen in raweliken weren heft, sunder ek wil der huve unde der vischerie bruken unde de gulde unde de nud darvan upnemen de wile dat ek leve. Wanne ek aver dot bin, so hort de huve unde de vischerie wedder to der vorscreven cappellen na utwisinge bischopes Hinrik van Hildesem seliger unde myner hern des capitteles breve, den se darup ggegeven unde vorsegelt hebben, unde so vortan schal de prester, de de capelle in lenschen weren heft, in dechtnissen hebben myner eldern sele unde myner in siner misse unde in sinem bede to ewiger tiden. Alle desse vorscreven stucke lovek vorscreven Otte Bock ridder, anders heten Ordenberg, vor mek unde myne erven hern Diderik van Rottinge, domhere to Hildesem, unde dem, de dat len in lene unde in weren heft, in guden truwen stede unde vast to holdene ane alle list, unde hebbe des to eyner openbaren bekantnisse myn ingesegel gehenget an dessen breff, datum anno domini M° CCCC° XI°, in die Nativitatis beate Marie virginis gloriose.